Read Biatah Bidayuh MAZMUR 56 Bible Online

MAZMUR 56 - Biatah Bidayuh bible

MAZMUR 56

¹[87] Masi di aku, O Tapa, sabab aku mbŭh dog nyerang; aku ari dog kisiis pinganyu ku.

²Ndi andu andu pinganyu ku nyerang aku. Mbŭh raru bagŭ ngara adi rawan aku.

³Kan aku taru, O TUHAN adi Bisa-pŭrŭg, aku sabah di Kaam.

⁴Aku sabah di Tapa ka aku dŭh taru; aku kibās Ayŭh amai kayuh adi-I janji. Ani bisa manusia ndai di tunduh ku?

⁵Pinganyu ku nyusah aku ndi andu andu; ngara ari bisatur munki re kandam aku!

⁶Ngara tikuruk di tarun yŭn bisukan ka nyibatŭh sopŭrŭg kayuh adi aku ndai, harap adŭp-i re siŭ aku.

⁷Ngukum[88] ngara, O Tapa, amai arap ngara; ngarah ngara darŭm baji Mai!

⁸Kaam puan munki susah aku; Kaam mbŭh nyikŭn randang batŭh ku. Dŭh kah sopŭrŭg-i mbŭh Kaam nuris di surat Mai?

⁹Di andu aku bagan Kaam, pinganyu ku ngundur. Aku puan ati: Tapa[89] agi ngga aku --

¹⁰Janji TUHAN, aku kibās.

¹¹Di Ayŭh aku sabah, ka aku dŭh re taru. Ani re bisa daya manusia ndai di tunduh aku?

¹²O Tapa, aku re jugan kayuh adi aku mbŭh janji; aku re nggen di Kaam pinganggen trima kaseh,

¹³sabab Kaam mbŭh pirupas aku so pinyikabŭs ka bada aku dŭh dog ngarah. Ka ngapŭi meh aku re panu di sirung jawin Tapa, ka tunda sekar jawa adi kayak aku ka udip adi sawŭ.