Read Biatah Bidayuh MAZMUR 58 Bible Online

MAZMUR 58 - Biatah Bidayuh bible

MAZMUR 58

¹[91] Agi kah angān adi pinguasa[92] matŭd itong ngga tŭnggŭn? Agi kah angān dŭh marad kan angān nggen bisara di daya?

²Mating! Kaŭs angān bipikir kayuh arap adi angān ndai, ka angān mbŭh ganas, sarah adi angān ndai di tarun tana ati.

³Daya adi ndai arap ari sarah sitŭkŭd umbur ngara; ngara piruah pinganang kadong so andu ngara dog biranak.

⁴Ngara bisā keya ka jippŭh; ngara mapot kajit ngara keya ka jippŭh sanduk adi taŭn bangam,

⁵adi dŭh dingah sirŭŭn daya adi tukang main jippŭh, puan kah ragu pinanung adi pitar.

⁶Mata jipŭh dudu singah adi mangah anŭ, O Tapa.

⁷Isa-i ngara miyap mun piin adi babas; isa-i ngara dog pirandŭk mun uduh di aran.[93]

⁸Isa-i ngara keya ka tikuyung adi mbŭh badŭh; isa-i ngara keya ka anak-pira kabŭs dŭh sipŭt kiris jawa tarun.

⁹Sibayuh ngara ngŭ-i, ngara dog kapŭg keya ka uduh; darŭm ruai baji Tapa re poh ngara darŭm ngara gibabŭ udip.

¹⁰Daya tŭnggŭn re gaŭn kan ngara kiris daya bidosa dog ukum; ngara re ngu kaja ngara di deya daya ginaka.

¹¹Daya re nang, “Daya tŭnggŭn sawŭ kambat upah-i; sawŭ agi Tapa adi nggen bisara di ong.”