Read Biatah Bidayuh MAZMUR 59 Bible Online

MAZMUR 59 - Biatah Bidayuh bible

MAZMUR 59

¹[94] Nyiramat aku so pinganyu ku, Tapa ku; grindung aku so ngara adi nyerang aku!

²Nyiramat aku so ngara adi arap; pirupas aku so bara pinyiŭ!

³Tingga! Ngara tuman aku; daya gaok mbŭh tikuruk rawan aku. Dŭh-i sabab dosa puan kah sarah adi aku mbŭh ndai,

⁴dŭh sabab aku mbŭh sarah, O TUHAN, adi bada ngara bigaut di natang aku.

⁵Makat, TUHAN Tapa Bisa-pŭrŭg, ka mandŭg di turung aku; adŭp Mai tingga, Tapa Israel! Burah meh ka ngukum daya adi dŭh puan Kaam; dŭhnyah masi di daya adi ginaka!

⁶Ngara pari ngga singumi andu, ngŭr mun kasong buang ngara panu di kupo.

⁷Dingah pinganang bakit ngga pinganang tatang ngara. Jura ngara mbŭh keya ka pedang di baba ngara, pak ngara pikir daya dŭh dingah ngara.

⁸Pak Kaam tawŭh ngara, TUHAN; ka pimangŭh daya adi dŭh puan Kaam.

⁹Aku biyŭn atin sabah di pinyibake Mai; Kaam inŭh pinyigrindung ku, O Tapa.

¹⁰Tapa ku rindu aku ka re mandŭg ka yŭn ku; Ayŭh re bada aku kiris pinganyu ku arah!

¹¹Dŭhnyah siŭ ngara, O Tapa, te daya ku kambŭt rai-i. Mesak ngara ngga pinyibake Mai ka ngarah ngara, O TUHAN, adi pinyigrindung ami.

¹²Dosa inŭh di baba ngara; sopŭrŭg pinganang ngara dosa; isa-i ngara rabu darŭm sambuh adŭp ngara! Sabab ngara mangu ka kadong,

¹³pirabur ngara darŭm baji Mai, ka pirarap ngara. Komŭnŭ barang naan re puan nang Tapa mritah di Israel, ka pritah-I mbŭh di ndi ong ong.

¹⁴Pinganyu ku pari ngga singumi andu, ngŭr mun kasong buang ngara panu darŭm kupo,

¹⁵mun kasong bidandong jiroh pinguman ka ngŭr kambŭi ngara dŭh dapŭd sadang pinguman.

¹⁶Pak aku re biragu pasar pinyibake Mai; barang isan aku re bana biragu amai pinyirindu Mai adi dŭh bisa birubah. Kaam inŭh pinyigrindung ku, adi grindung aku di tika susah.

¹⁷Aku re kibās Kaam, pingibān ku. Kuta ku inŭh Tapa, Tapa adi rindu aku.