Read Biatah Bidayuh MAZMUR 60 Bible Online

MAZMUR 60 - Biatah Bidayuh bible

MAZMUR 60

¹[95] Kaam mbŭh tirawan kieh, Tapa, ka ngarah kieh; Kaam mbŭh baji di kieh -- pak madin pari meh ka kieh.[96]

²Kaam mbŭh bada tana bigugoh, ka Kaam mbŭh bada-i tipire; madin nguri tawan-i, sabab-i rubuh.

³Kaam mbŭh bada daya Mai sangsara; kieh tibabeu panu keya ka daya mabuk.

⁴Kaam mbŭh bakan ngara adi kiren stabi di Kaam, isa ngara rupas so pinyirusag.

⁵Nyiramat kieh ngga pinyibake Mai; nam dua ami, isa daya adi Kaam rindu bisa dog pirupas.

⁶So yŭn pinyirŭŭ-I[97] Tapa mbŭh nang, “Ngga bragah Aku re kutung nyinuwŭh Shechem ka nggen Rubān Sukkoth ka daya Ku.

⁷Gilead inŭh jaku, ka simŭnŭ gŭh Manasseh; Ephraim inŭh tupi basi Ku ka Judah inŭh sikud-pinyipritah Ku.

⁸Pak Aku re pakai Moab ndu sambong-pinyingu ka aku re taran kasut Ku di Edom, ndu tandā-i dog dapu Ku. Agi kah daya Philistine pikir adŭp-i re nyirais amai mbŭh manang ngarah Aku?”

⁹Asi, O Tapa, re taban aku di ka kupo adi bikuda? Asi re nguru aku di ka Edom?

¹⁰Kaam mbŭh batur batur tirawan kieh kah? Dŭh kah Kaam re sua matak biperang ngga bara soldadu ami?

¹¹Turung kieh rawan pinganyu ami; pinurung manusia dŭh-i biguna.

¹²Amai Tapa turung kieh, kieh re manang; Ayŭh re ngarah pinganyu ami.