Read Biatah Bidayuh MAZMUR 61 Bible Online

MAZMUR 61 - Biatah Bidayuh bible

MAZMUR 61

¹[98] Dingah sien ku, O Tapa; dingah dua ku!

²Darŭm susah buang jo so ramin arŭn aku bagan Kaam! Taban aku ka yŭn adi siramat,

³amai Kaam inŭh pinyigrindung ku, pingibān ku adi tagap adi grindung aku so pinganyu ku.

⁴Bada aku rŭŭ sitŭkŭd umbur ku di yŭn pinyirŭŭ Mai; bada aku dapŭd siramat di ribo urad Mai.

⁵Kaam mbŭh dingah janji ku, O Tapa, ka Kaam mbŭh nggen di aku kayuh ngara adi stabi di Kaam.

⁶Nambah umbur raja; bada ayŭh adu adu udip!

⁷Isa-i ayŭh mritah ndŭg situi tui di sirung jawin Mai, O Tapa; grindung ayŭh ngga pinyitŭtŭd Mai ka pinyirindu Mai adi dŭh bisa birubah.

⁸Isa aku re ari nang ragu puji ka Kaam, darŭm aku barang andu jugan ka Kaam kayuh adi aku mbŭh janji.