Read Biatah Bidayuh MAZMUR 65 Bible Online

MAZMUR 65 - Biatah Bidayuh bible

MAZMUR 65

¹[103] O Tapa, batur inŭh kieh muji Kaam di Zion ka sita janji ami di Kaam,

²sabab Kaam nam dua. Daya di barang yŭn re mandŭg ka Kaam

³sitagar dosa ngara. Sarah ami ngarah kieh,[104] pak Kaam apun-i.

⁴Sanang inŭh ngara adi Kaam mien, adi Kaam taban bada rŭŭ di yŭn pinyirŭŭ Mai. Kieh re munos ngga kayuh kana di Ramin Mai, adi berkat Ramin kudus Mai.

⁵Kaam nam kieh ka nggen pimanang di kieh ka Kaam mbŭh ndai pingandai saruh ngga nyiramat kieh. Daya di ndi ong ong samŭn adi jeh mutas rawŭt adi jo sabah di Kaam.

⁶Kaam na darŭd darŭd di yŭn-i ngga pinyibake adŭp Mai, adi kiren kuasa bās Mai.

⁷Kaam pirŭŭ magā girumbang di rawŭt ka pirŭŭ jawŭn girumbang; Kaam pirŭŭ sirais bara daya.

⁸Sopŭrŭg daya di ong taru buang stabi di kayuh bās adi Kaam mbŭh ndai. Pingandai Mai taban sirais gaŭn so parad andi ong ndŭg parad mandi.

⁹Kaam nggen ujen ngga sita tana; Kaam bada-i kana ka damŭn. Kaam ngisi sungi ngga piin; Kaam bada tana piruah buwa pimuruh. Simuti inŭh Kaam ndai-i:

¹⁰Kaam bada andu awet ujen da nyatŭk tana adi muko dog majak ka misa-i ngga piin; Kaam pidŭdŭt tana ngga ujen ka bada anak anak pimuruh timbu

¹¹Munki masam bagŭ-i pingatŭm dog nggen Mai! Di barang yŭn Kaam panu, diginŭ agi raru bagŭ.

¹²Tarun tana kupai puno ngga dāng kudip; bŭngŭn sandah puno ngga gaŭn.

¹³Ŭmŭh biyŭn dudu biri dieh; rubān puno ngga gandom. Barang masam kayuh nyirais ka biragu darŭm pawŭn.