Read Biatah Bidayuh MAZMUR 68 Bible Online

MAZMUR 68 - Biatah Bidayuh bible

MAZMUR 68

¹[108] Tapa makat ka mesak bara pinganyu-I. Ngara adi tiru di Ayŭh bikaduh bu amai arah.

²Keya ka asuh dog poh, ngara dog pibu-I; keya ka dian riris sindŭk apui, simŭnŭ inŭh daya ginaka rarap di sirung jawin Tapa.

³Pak daya tŭnggŭn gaŭn ka pawŭn di sirung jawin-I; ngara sanang ka nyirais amai gaŭn.

⁴Biragu yŭn Tapa, nang ragu puji yŭn adŭn-I; sidia aran yŭn-I adi panu ngga abun;[109] Adŭn-I inŭh TUHAN -- gaŭn meh di sirung jawin-I!

⁵Tapa, adi rŭŭ di Ramin kudus-I, kingat anak tumang ka grindung dayung uban.

⁶Ayŭh nggen ramin arŭn di ngara adi udip sadi ka piruah daya-takap da udip sanang, pak ngara adi birawan re dog bada rŭŭ di tarun tana adi jo.

⁷O Tapa, di tika Kaam nguru daya Mai, di tika Kaam mutas tarun tana-pajam,

⁸ tana bigugoh, ka ujen rabu so rangit, sabab pimandŭg Tapa Sinai,[110] pimandŭg Tapa Israel.

⁹Kaam bada ujen bangat ka namŭh tana Mai adi mbŭh nyirangas;

¹⁰daya Mai piramin diginŭ; ngga mandis Mai Kaam sita daya adi sirata.

¹¹TUHAN nggen pesan-I, ka bagŭ dayung taban agah anŭ:

¹²“Raja raja ngga bara soldadu ngara babak bu!” bara dayung di ramin kutung kayuh adi muko dog sirapas:

¹³patong patong manuk asang adi dog marut ngga pirak, urad-i bringam ngga mas adi grua. (Mani angān kurung adŭp ngan ngga biri biri di andu daya biperang?)

¹⁴Kan Tapa Bisa-pŭrŭg mesak bara raja di Darŭd Zalmon, Ayŭh bada salju rabu diginŭ.

¹⁵Darŭd Bashan inŭh bās, darŭd adi bagŭ tibung-i!

¹⁶Mani so tibung mu adi bās kuu tingga ngga tiru di darŭd[111] adi Tapa mbŭh mien yŭn-I rŭŭ? TUHAN re rŭŭ diginŭ ndŭg situi tui!

¹⁷Ngga biribu ribu krita kuda-I adi baga TUHAN mandŭg so Sinai[112] di ka yŭn anŭ adi kudus.

¹⁸ Ayŭh maad ka yŭn adi bigatung, taban bagŭ daya-takap; Ayŭh kambat pinganggen so bara daya adi gagā birawan. TUHAN Tapa re rŭŭ diginŭ.

¹⁹Muji meh TUHAN, adi kabis pinyirabis ta adi bat barang andu; Ayŭh inŭh Tapa adi nyiramat ata.

²⁰Tapa ta inŭh Tapa adi nyiramat; Ayŭh inŭh TUHAN, adi pirupas ata so pinyikabŭs.

²¹Tapa re sawŭ mata tungo pinganyu-I, tungo ngara adi ngandŭ ndai dosa.

²²TUHAN mbŭh nang, “Aku re taban pinganyu mu pari so Bashan; Aku re tambit ngara pari so rasan rawŭt,

²³isa angān bisa ngu kaja ngan di deya ngara, ka kasong ngan bisa nyarek deya ngara ngga sipuas-i.”

²⁴O Tapa, baris pimanang Mai dog kiris sopŭrŭg daya, baris Tapa, Raja ku, di ka darŭm yŭn pinyirŭŭ-I.

²⁵Bara pinyanyi di jawin, bara adi main musik di punok, di yun agi bara dayung adi mara mambak tamburin.

²⁶“Muji meh Tapa di yŭn daya-I tikuruk; muji meh TUHAN, sopŭrŭg sesang Jacob!”

²⁷Sibungas-i Benjamin, tibaran-asar adi siabo sŭ, komŭnŭ bara pinguru Judah ngga tibaran ngara, ka dog tunda bara pinguru Zebulun ngga Naphtali.

²⁸Kiren kuasa Mai, O Tapa, kuasa adi Kaam mbŭh pakai ngga turung kieh,

²⁹so Ramin Mai di Jerusalem, di yŭn raja raja taban pinganggen ka Kaam.

³⁰Ngukum Egypt, dāng tarun anŭ adi di ruang tŭngŭn tŭngŭn reed; ngukum bangsa bangsa, kaban dari sapi anŭ ngga bara anak-i, ndŭg ka ngara mutu ubak ngara ka jugan ka Kaam pirak ngara. Mesak ngara adi suka biperang![113]

³¹Bara Pingarun[114] re mandŭg so Egypt; daya Ethiopia[115] re pakat tangan ngara darŭm bidua ka Tapa.

³²Biragu ka Tapa, sopŭrŭg pritah ong, nang ragu puji ka TUHAN,

³³ka Ayŭh adi panu di rangit, rangit ndun jah. Dingah Ayŭh nyirais sirais adi raru bana.

³⁴Piagah kuasa Tapa; Ayŭh dog stabi di Israel, kuasa-I tatŭng di rangit.

³⁵Munki masam taru nŭŭh kiris Tapa darŭm Ayŭh mandŭg so yŭn pinyirŭŭ-I, Tapa Israel! Ayŭh nggen pinyibake ngga kuasa di daya-I. Ja ata muji Tapa!