Read Biatah Bidayuh MAZMUR 71 Bible Online

MAZMUR 71 - Biatah Bidayuh bible

MAZMUR 71

¹TUHAN, aku mandŭg ka Kaam yŭn pinyigrindung dŭhnyah bada aku dog ngarah!

²Sabab Kaam tŭnggŭn, turung aku ka pirupas aku. Dingah aku ka nyiramat aku!

³Jadi pinyigrindung ku adi tagap ka kuta adi tagap[119] adi grindung aku; Kaam inŭh yŭn ku bisukan adi ngibān aku.

⁴Tapa ku, pirupas aku so daya ginaka, so kuasa ngara adi gaok ka arap.

⁵TUHAN Raja, aku na pingarap ku di Kaam; aku sabah di Kaam so aku gibabŭ mara.

⁶Aku mbŭh bisangan di Kaam sitŭkŭd umbur ku; Kaam mbŭh grindung[120] aku so andu aku dog biranak. Aku re ari muji Kaam.

⁷Pimudip ku mbŭh jadi suto yŭn daya bagŭ, sabab Kaam inŭh pingibān ku adi tagap.

⁸Ndi andu andu aku muji Kaam ka piagah bragah Mai.

⁹Dŭhnyah tirawan aku amai aku mbŭh minyamba madin; dŭhnyah tagan aku amai aku mbŭh ramah madin.

¹⁰Pinganyu ku raan siŭ aku; ngara minyu ka bipekat rawan aku.

¹¹Ngara nang, “Tapa mbŭh tagan ayŭh; ja tadak ayŭh ka nakap ayŭh; mating daya re nyiramat ayŭh.”

¹²Dŭhnyah rŭŭ raru jo so aku, O Tapa; Tapa ku, rikas turung aku!

¹³Isa-i ngara adi nyerang aku dog ngarah ka dog pirabur. Isa-i ngara adi suba kandam aku dog pimangŭh ka dog kinarap.

¹⁴Aku re ari na pingarap ku di Kaam; aku re adu adu muji Kaam.

¹⁵Aku re piagah kana Mai; ndi andu andu aku re minyu pasar pinyiramat Mai, sunggu-i rabis so adi tungang aku mirati.

¹⁶Aku re muji Kaam, TUHAN, amai pingandai bās Mai; aku re piagah kana Mai, ka jamai adŭ.

¹⁷Kaam mbŭh ngajar aku so aku gibabŭ mara, ka aku babŭ kidaan pasar pingandai bās Mai.

¹⁸Madin aku mbŭh minyamba ka ubok ku mbŭh buda, dŭhnyah tagan aku, O Tapa! Agi ngga aku darŭm aku piagah kuasa ngga pinyibake Mai di sopŭrŭg turap adi re.

¹⁹Pinŭnggŭn Mai, Tapa, ndŭg rangit. Kaam mbŭh ndai kayuh adi bās; mating adi bŭkŭn re mun Kaam.

²⁰Kaam mbŭh pait pito ngga sangsara di tunduh aku, pak Kaam re pari pinyibake ku; Kaam re pijo aku so rubang kubur.

²¹Kaam re bada aku bās so adi mbŭh; Kaam re nyaduh aku dinge.

²²Aku re sawŭ muji Kaam ngga kachapi; aku re muji pinyitŭtŭd Mai, Tapa ku. Ngga kachapi ku aku re mambak ragu ka Kaam, Kaam adi Kudus yŭn Israel.

²³Aku re nyirais amai gaŭn darŭm aku main yŭn Mai; ngga siabo asŭng ku aku re biragu sabab Kaam mbŭh nyiramat aku.

²⁴Aku re minyu pasar pinŭnggŭn Mai ndi andu andu, sabab ngara adi suba an kandam aku mbŭh dog ngarah ka dog pimangŭh.