Read Biatah Bidayuh MAZMUR 73 Bible Online

MAZMUR 73 - Biatah Bidayuh bible

MAZMUR 73

¹[124] Tapa taŭn sawŭ kana ngga Israel, di ngara adi biyŭn atin bisig.

²Pak aku batang re manyap atin sabah; pinyabah ku batang re mating tia

³sabab aku sina di ngara adi sambuh kan aku kiris daya ginaka mujur di kraja ngara.

⁴Ngara dŭh naman andam; ngara bake buang dŭh udah dog andam.

⁵Ngara dŭh sangsara mun daya bŭkŭn; ngara dŭh biyŭn pinyusah mun daya bŭkŭn.

⁶Ngapŭi meh ngara pakai ndu kukong uap-sambuh ka pinyiganas ndu jipo-ambu;

⁷atin ngara piruah kayuh arap,[125] ka pikir ngara puno ngga akar adi arap.

⁸Ngara tawŭh daya ka nang kayuh adi arap; ngara sambuh ka bisatur an kinanyuh daya bŭkŭn.

⁹Ngara kinarap Tapa di shorga ka barang ka mun ngga uap sambu-i mritah daya di ong,

¹⁰isa ndŭg ka daya Tapa tunda ngara ka graŭh an sabah tadŭ tadŭ kayuh adi ngara nang.[126]

¹¹Ngara nang, “Tapa dŭh re puan kayuh adi jadi; adi Siabo Bigatung dŭh re puan pingandai ta.”

¹²Simŭnŭ inŭh daya adi ginaka. Ngara mbŭh biyŭn bagŭ ka babŭ gŭh dapŭd rabis-i.

¹³Ani pada-i, meh, aku bada adŭp ku bisig ka dŭh ndai dosa?

¹⁴O Tapa, Kaam mbŭh bada aku sangsara ndi andu andu; barang isan Kaam mbŭh ngukum aku.

¹⁵Kambŭi aku agi nang sakanŭ, aku tatu dŭh re mun daya Mai.

¹⁶Aku re suba pikir ani har anŭ, pak-i paŭh mbar re ku mirati

¹⁷ndŭg ka aku mŭrŭt Ramin Mai. Nganŭ aku mirati kayuh adi re jadi di daya ginaka.

¹⁸Kaam re na ngara di tarun adi jarŭh ka bada ngara rabu ka darŭm pinyirusag!

¹⁹Ngara rasu dog pirabur; ngara rabu ka darŭm pinŭbŭn adi sipŭ.

²⁰Ngara keya ka pŭmŭh adi miyap isan isan; kan Kaam makat, O TUHAN, ngara miyap.

²¹Kan pikir-kira ku pa'it ka yang ku mandam,

²²aku mbŭh budo keya ka dāng; aku dŭh mirati Kaam.

²³Pak aku ari rŭŭ sindŭk Kaam, ka Kaam digŭng tangan ku.

²⁴Kaam kayak aku ngga ajar Mai ka di pinŭbŭn-i Kaam re trima aku ngga stabi.

²⁵Ani re aku biyŭn di shorga adŭ-i Kaam? Amai aku biyŭn Kaam, ani re aku raan di ong?

²⁶Pikir ku ngga pŭrŭng ku re makin ramah, pak Tapa inŭh pinyibake ku; Ayŭh inŭh sopŭrŭg-i adi aku raan.

²⁷Ngara adi tagan Kaam manŭn re rarap; Kaam re pirabur ngara adi dŭh tŭtŭd di Kaam.

²⁸Pak aku, mbŭh raru utung tungang sindŭk Tapa, tungang dapŭd pinyigrindung so TUHAN Raja, ka piagah sopŭrŭg kayuh adi Ayŭh mbŭh ndai!