Read Biatah Bidayuh MAZMUR 74 Bible Online

MAZMUR 74 - Biatah Bidayuh bible

MAZMUR 74

¹[127] Mani Kaam tagan kieh mun ati, O Tapa? Re adu adu kah Kaam baji di daya Mai?

²Ingat daya Mai adi Kaam mbŭh so jah mien yŭn adŭp Mai, adi Kaam mbŭh piruah so jadi urun bada jadi daya Mai. Ingat Sandah Zion, di yŭn Kaam ko rŭŭ.

³Ngitak sakong Mai di yŭn sopŭrŭg-i mbŭh rubuh; pinganyu ami mbŭh pirusak sopŭrŭg kayuh adi darŭm Ramin Mai.

⁴Pinganyu Mai mbŭh nyirais amai manang darŭm Ramin Mai; ngara mbŭh pijog binira ngara diginŭ ndu tandā pimanang.

⁵Ngara dog kiris mun daya adi tukang tabŭng kayuh, tabŭng kayuh ngga kapak ngara.[128]

⁶Ngara mape sopŭrŭg sindung kayuh ngga kapak ka ngga pabā ngara.

⁷Ngara badang Ramin Mai ndŭg ka rŭpŭg; ngara nyembar tarun yŭn Kaam dog nyambah.

⁸Ngara raan pirandŭk kieh bada asur; ngara sigot barang tarun yŭn adi kudus di tarun tana ati.

⁹Sopŭrŭg tandā pinatŭng adi kudus yŭn ami mbŭh mating; nabi mbŭh mating tia, ka mating daya puan ndŭg sinde kayuh ati simuti.

¹⁰Ndŭg sinde, O Tapa, pinganyu ami tawŭh Kaam? Re ndŭg jŭ kah ngara nggen mangŭh di adŭn Mai?

¹¹Mani Kaam abah turung kieh? Mani Kaam na tangan Mai di punok Mai?[129]

¹²Pak Kaam mbŭh raja ami so sibungas-i, O Tapa; Kaam mbŭh siraru nyiramat kieh.

¹³ Ngga pinyibake bās Mai Kaam mbŭh mire nyinuwŭh rawŭt ka mape ubak dāng dāng-bās di rawŭt;

¹⁴ Kaam mape ubak dāng-bās Leviathan[130] ka nggen tadang-i ndu pinguman dāng dāng tarun tana-pajam.[131]

¹⁵Kaam bada piin di sungi ngga di rubang-piin aman; ka bada sungi adi bayah badŭh.

¹⁶Kaam napa sandu ngga singarŭm; Kaam na batŭh andu ngga buran di yŭn ngara;

¹⁷Kaam mbŭh natu siri siri bŭngŭn ong; Kaam mbŭh natu tipuh paras ngga tipuh madud.

¹⁸Pak ingat, O TUHAN, pinganyu Mai tawŭh Kaam, ngara dŭh stabi di Kaam ka ngamun Kaam.

¹⁹Dŭhnyah tagan daya Mai adi rumuh ka darŭm tangan pinganyu ngara; dŭhnyah kambŭt daya Mai adi dog kisiis!

²⁰Ingat simanya Mai adi Kaam mbŭh ndai ngga kieh. Di barang sikuh tarun tana adi karŭm agi pinyiganas.

²¹Dŭhnyah bada daya adi dog kinanyuh dog pimangŭh; bada daya adi sirata ngga adi dŭh biyŭn ani ani muji Kaam.

²²Makat meh, Tapa, ka nyibandar adŭp Mai! Ingat daya adi dŭh stabi di Kaam tawŭh Kaam ndi andu andu.

²³Dŭhnyah kambŭt sirais baji pinganyu Mai, dudu adi dŭh rŭŭ rŭŭ so daya adi rawan Kaam.