Read Biatah Bidayuh MAZMUR 76 Bible Online

MAZMUR 76 - Biatah Bidayuh bible

MAZMUR 76

¹[135] Tapa inŭh dog puan di Judah; adŭn-I dog stabi di Israel.

²Ayŭh biyŭn yŭn rŭŭ di Jerusalem; Ayŭh rŭŭ di Sandah Zion.

³Diginŭ Ayŭh mata reja-panah pinganyu, pinangin ngga pedang ngara, sawŭ, sopŭrŭg sinyata ngara.

⁴Munki masam bragah-i Kaam, O Tapa! Munki masam bikuasa-i Kaam, darŭm Kaam pari so darŭd di yŭn Kaam ngarah pinganyu Mai.

⁵Sopŭrŭg kayuh adi soldadu ngara adi pagan biyŭn mbŭh dog pirukos ka madin mbŭh bŭŭs darŭm pinyibŭŭs kabŭs; sopŭrŭg pinyibake ngga pimandai ngara mbŭh dŭh biguna.

⁶Kan Kaam pirawan ngara, O Tapa Jacob, kuda kuda ngga ngara adi nunggang-i rabu ka kabŭs.

⁷Pak Kaam, TUHAN, dog taru sopŭrŭg. Mating daya tungang situra jawin ngga Kaam kan Kaam baji.

⁸Kaam nggen pinganang Mai so shorga; ong mbŭh taru ka pajam,

⁹kan Kaam makat re matŭd itong, an nyiramat sopŭrŭg adi dog kinanyuh di ong.

¹⁰Baji manusia batur-i bada puji ka Kaam bitambah; ngara adi dŭh kabŭs darŭm perang re sita gawai Mai.[136]

¹¹Nggen ka TUHAN adi Tapa ngan kayuh adi angān mbŭh bijanji an nggen; taban pinganggen ka Ayŭh, sopŭrŭg ngan bangsa adi maning tarun tana ati. Tapa bada barang naan daya taru di Ayŭh;

¹²Ayŭh pirapat pimritah adi sambuh ka pitaru bara raja adi bās.