Read Biatah Bidayuh MAZMUR 77 Bible Online

MAZMUR 77 - Biatah Bidayuh bible

MAZMUR 77

¹[137] Aku bagan bana ka Tapa; aku sien bana, ka Ayŭh dingah aku.

²Di tika susah aku bidua ka TUHAN; ndi ngarŭm ngarŭm aku pakat tangan ku darŭm bidua, pak aku dŭh tungang dapŭd saduh.

³Kan aku pikir Tapa, aku ngasŭng payah; kan aku nakit bipikir, aku nyam adi jimŭ.

⁴Ayŭh bada aku burah ndi ngarŭm ngarŭm; aku raru susah ndŭg ka aku dŭh bisa minyu.

⁵Aku bipikir pasar tipuh adi mbŭh ripas ka ingat sawa adi jah.

⁶Ndi ngarŭm ngarŭm aku bipikir ngga sitŭrŭp-i;[138] Aku nakit bipikir, ka ati inŭh kayuh adi aku siken adŭp ku:

⁷“Re siraru kah Tapa tirawan ata? Re dŭh tia kah Tapa munos asŭng di ata?

⁸Mbŭh dŭh kah Ayŭh tia rindu ata? Mbŭh dŭh kah janji-I tia biguna?

⁹Mbŭh kambŭt kah Tapa adŭp-I masi? Mbŭh raru baji kah Tapa ndŭg ka Ayŭh mbŭh kambŭt adŭp-I masi?”

¹⁰Komŭnŭ aku nang, “Kayuh adi bada aku raru mandam inŭh ati -- Tapa mbŭh dŭh tia bikuasa.”[139]

¹¹Aku re ingat pingandai bās Mai, TUHAN; aku re ingat pingandai saruh adi Kaam mbŭh ndai jah.

¹²Aku re pikir pasar sopŭrŭg kayuh adi Kaam mbŭh ndai; aku re nakit pikir di sopŭrŭg pingandai bās Mai.

¹³Sopŭrŭg adi Kaam ndai, O Tapa, inŭh kudus. Mating tapa bŭkŭn re bās mun Kaam.

¹⁴Kaam inŭh Tapa adi ndai pingandai-nginga; Kaam kiren pinyibake Mai di dupan barang bangsa.

¹⁵Ngga kuasa Mai Kaam nyiramat daya Mai, sesang Jacob ngga sesang Joseph.

¹⁶Kan piin kiris Kaam, O Tapa, ngara taru, ka rasan rawŭt bigagar.

¹⁷Abun pirabu ujen; dudū jawŭn di rangit, ka kijat mikirab di barang yŭn.

¹⁸Jawŭn dudū raru tui, ka mikirab kijat pijawa ong; ka ong bigagar ka gimŭgŭs.

¹⁹Kaam panu so girumbang; Kaam mutas rawŭt adi tŭrŭp, pak inyŭk kaja Mai dŭh tungang dog kiris.

²⁰Kaam nguru daya Mai keya ka nguru biri, ka Moses ngga Aaron jadi pinguru.