Read Biatah Bidayuh MAZMUR 80 Bible Online

MAZMUR 80 - Biatah Bidayuh bible

MAZMUR 80

¹[144] Dingah kieh, O Pingingat Israel; dingah kieh, pinguru kaban biri Mai. Guru di takta Mai di tunduh cherubim,

²pinandŭng adŭp Mai di tibaran-asar Ephraim, Benjamin, ngga Manasseh. Kiren pinyibake Mai di kieh; mandŭg ka nyiramat kieh!

³Taban kieh ngga pari, O Tapa! Kiren di kieh masi Mai, ka kieh re dog nyiramat!

⁴Ndŭg sinde, Tapa Bisa-pŭrŭg, Kaam re baji ngga dua daya Mai?

⁵Kaam mbŭh nggen pinyusah da kieh man randang batŭh darŭm tibande saker bada Mai kieh nok.

⁶Kaam bada bangsa bangsa adi maning kieh biperang yŭn re an tambit tarun tana ami; pinganyu ami tawŭh ka napat kieh.

⁷Tambit kieh pari, Tapa Bisa-pŭrŭg! kiren masi Mai di kieh, ka kieh re dog nyiramat!

⁸Kaam taban tŭngŭn anggor ruah so Egypt; Kaam pibu bangsa bangsa adi bŭkŭn ka purun-i di tana ngara.

⁹Kaam sayan tarun yŭn-i timbu; uat-i tŭrŭp, ka-i ngukap di barang yŭn.

¹⁰Sandah sandah dog nutu ngga sayung-i; daan-i mbŭh bigatung so tibande tŭngŭn sedar.

¹¹Daan daan-i bayah ndŭg Rawŭt Mediterranean ka jeh ndŭg Yang Euphrates.

¹²Mani Kaam nyirubuh buwang buwang adi maning-i? Madin tadŭ daya adi murah dapŭd naku buwa-i;

¹³pangān bidigang dieh, ka dāng tarun man-i.

¹⁴Kimat kieh, Tapa Bisa-pŭrŭg! Tingga kieh so shorga; mandŭg ka nyiramat daya Mai!

¹⁵Mandŭg ka nyiramat tŭngŭn anggor ati adi Kaam purun, tŭngŭn anggor ati adi mara adi Kaam bada tagap!

¹⁶Pinganyu ami mbŭh badang ka tabŭng-i; tingga ngara ngga baji Mai ka pirabur ngara!

¹⁷Kingat ka grindung daya Mai adi Kaam mbŭh mien, bangsa adi Kaam bada bake.

¹⁸Kieh dŭh re miriseu so Kaam dinge; kudip kieh, ka kieh re muji Kaam.

¹⁹Tambit pari kieh, TUHAN Tapa Bisa-pŭrŭg. Kiren masi di kieh, ka kieh re siramat.