Read Biatah Bidayuh MAZMUR 83 Bible Online

MAZMUR 83 - Biatah Bidayuh bible

MAZMUR 83

¹[147] O Tapa, dŭhnyah dŭh minyu; dŭhnyah dŭh ndai ani ani, dŭhnyah pajam!

²Tingga! Pinganyu Mai mbŭh bago, ka ngara adi tiru di Kaam mbŭh birawan.

³Ngara bisatur darŭm bisukan rawan daya Mai; ngara bipekat rawan ngara adi Kaam grindung.

⁴Ngara nang, “Ja ata di pirabur bangsa ngara, isa Israel dŭh re tia dog ingat ndŭg situi tui.”

⁵Ngara situju di pekat ngara ka mbŭh bipambit rawan Kaam:

⁶daya Edom ngga daya Ishmael; daya Moab ngga daya Hagri;

⁷daya Gebal, daya Ammon, ngga daya Amalek, ka daya Philistine ngga daya Tyre.

⁸Daya Assyria gŭh sua ngga ngara, pambit adi bake daya Ammon ngga daya Moab, adi sesang Lot.

⁹Ndai di ngara kayuh adi Kaam mbŭh ndai di daya Midian, ka di Sisera ngga Jabin di Yang Kishon.

¹⁰Kaam mbŭh ngarah ngara di Endor, ka tadang ngara madam di tunduh tana.

¹¹ Ndai di pinguru ngara anŭ adi Kaam mbŭh ndai di Oreb ngga Zeeb; ngarah sopŭrŭg pimritah ngara nimun Kaam mbŭh ngarah Zebah ngga Zalmunna,

¹²adi nang, “Kieh re tambit tana anŭ adi Tapa dapu.”

¹³Mesak ngara keya ka dabu tana, O Tapa, mun siriyang dog poh sabak.

¹⁴Nimun apui man darŭm tarun, nimun sandah dog sigot so anak apui,

¹⁵tadak ngara ngga sabak biriyung Mai ka pitaru ngara ngga sabak ribut Mai.

¹⁶Pimangŭh ngara, O TUHAN, ka bada ngara natŭng ka trima kuasa Mai.

¹⁷Isa-i ngara dog ngarah ka adu adu taru; isa-i ngara kabŭs darŭm sukup mangŭh.

¹⁸Isa-i ngara puan nang Kaam sadi adŭ adi TUHAN, pimritah adi bās di ndi ong ong.