Read Biatah Bidayuh MAZMUR 84 Bible Online

MAZMUR 84 - Biatah Bidayuh bible

MAZMUR 84

¹[148] Aku raru rindu Ramin Mai, TUHAN adi Bisa-pŭrŭg!

²Aku raru raan rŭŭ diginŭ! Aku raru natis an rŭŭ di Ramin TUHAN. Ngga siabo asŭng ku aku biragu amai gaŭn yŭn Tapa adi udip.

³Manuk piit babŭ gŭh biyŭn yŭn-i rŭŭ, ka manuk tipiris biyŭn gŭh sarin-i; ngara na anak ngara sindŭk mija-sambah Mai, TUHAN adi Bisa-pŭrŭg, raja ngga Tapa ku.

⁴Sanang inŭh ngara adi rŭŭ di Ramin Mai, siraru biragu puji ka Kaam.

⁵Sanang inŭh ngara adi dapŭd pinyibake so Kaam, adi graŭh raan matak di nyambah Kaam di Sandah Zion.

⁶Darŭm ngara kadŭg rubān Baca adi badŭh, tarun anŭ jadi yŭn bagŭ rubang piin; ujen di tipuh jaya ngisi pagong pagong-i.

⁷Ngara jadi bitambah bake darŭm ngara panu; ngara re kiris Tapa bara tapa di Sandah Zion.

⁸Dingah dua ku, TUHAN adi Tapa Bisa-pŭrŭg. Nyiringa, O Tapa Jacob!

⁹Nyiberkat raja ami, O Tapa, raja adi Kaam mbŭh mien.

¹⁰Rŭŭ ndi andu di Ramin Mai inŭh kana dŭ so nŭŭh rŭŭ siribu andu di tarun bŭkŭn; raan dŭ aku mijog di rawa buwang Ramin Tapa so ku rŭŭ di ramin daya ginaka.

¹¹TUHAN inŭh pinyigrindung ngga raja ta adi bibragah, nyiberkat ata ngga mandis ngga stabi. Ayŭh dŭh abah nggen tadŭ tadŭ kayuh kana di ngara adi ndai kayuh adi batur.

¹²TUHAN adi Bisa-pŭrŭg, sanang inŭh ngara adi sabah di Kaam!