Read Biatah Bidayuh MAZMUR 85 Bible Online

MAZMUR 85 - Biatah Bidayuh bible

MAZMUR 85

¹[149] TUHAN, Kaam mbŭh masi di tarun tana Mai; Kaam mbŭh bada Israel pari mujur.

²Kaam mbŭh apun dosa daya Mai ka mbŭh apun sopŭrŭg pingandai sarah ngara.

³Kaam mbŭh dŭh tia baji di ngara ka mbŭh nan bangok Mai.

⁴Taban kieh ngga pari, O Tapa adi pinyikudip ami, ka dŭh tia dŭh munos asŭng ngga kieh!

⁵Re adu adu kah Kaam tuas di kieh? Re dŭh pandai ko kah baji Mai?

⁶Bada kieh bake dinge, ka kieh, daya Mai, re muji Kaam.

⁷Kiren di kieh pinyirindu Mai adi dŭh bisa birubah, O TUHAN, ka nggen di kieh pinurung Mai adi nyiramat.

⁸Aku dingah kayuh adi TUHAN Tapa nang; Ayŭh bijanji an nggen damai ka ata, adi daya-I, kambŭi ata dŭh pari ka pimudip budo ta.

⁹Ayŭh sawŭ mbŭh sidia an nyiramat ngara adi stabi di Ayŭh, ka bragah-I re rŭŭ di tarun tana ta.

¹⁰Pinyirindu ngga pinyitŭtŭd re bidapŭd; pinŭnggŭn ngga damai re bisindi.

¹¹Pinyitŭtŭd manusia re makat so ong, ka pinŭnggŭn Tapa re tingga ka sagān so shorga.

¹²TUHAN re bada ata mujur, ka tana ta re piruah pingatŭm bās.

¹³Pinŭnggŭn re matak diŭ so TUHAN ka sidia aran yŭn-I panu.