Read Biatah Bidayuh MAZMUR 89 Bible Online

MAZMUR 89 - Biatah Bidayuh bible

MAZMUR 89

¹[156] O TUHAN, aku re ari nyiragu pinyirindu Mai adi dŭh bisa birubah; aku re piagah pinyitŭtŭd Mai ndŭg situi tui.

²Aku puan nang pinyirindu Mai re tan ndŭg situi tui, ka pinyitŭtŭd Mai inŭh mun mun-i keya ka rangit.

³Kaam nang, “Aku mbŭh ndai simanya Ku ngga daya adi Aku mbŭh mien; Aku mbŭh bijanji di urun Ku David,

⁴ ‘Sesang mu re ari jadi raja; Aku re kingat takta mu ndŭg situi tui.’ ”

⁵Rangit biragu yŭn pingandai saruh Mai; bara adi kudus biragu yŭn pinyitŭtŭd Mai, TUHAN.

⁶Mating adi bŭkŭn di rangit re brimun ngga Kaam, TUHAN; mating malaikat di shorga re tungang dog danding ngga Kaam.

⁷Kaam dog stabi di udung bās bara adi kudus; ka sopŭrŭg ngara taru di Kaam.

⁸TUHAN Tapa Bisa-pŭrŭg, mating adi bŭkŭn adi bikuasa mun Kaam; darŭm sopŭrŭg kayuh Kaam inŭh tŭtŭd, O TUHAN.

⁹Kaam mritah rawŭt bās; Kaam pirŭŭ girumbang-i adi bisā.

¹⁰Kaam pirandŭk ka siŭ Rahab,[157] adi dāng-bās rawŭt anŭ; ka ngga kuasa bās Mai Kaam ngarah pinganyu Mai.

¹¹Shorga inŭh jamai, ka simŭnŭ gŭh ong; Kaam napa ong ka sopŭrŭg kayuh dieh.

¹²Kaam napa utara ngga siratan; Darŭd Tabor ngga Darŭd Hermon biragu ka Kaam amai gaŭn.

¹³Munki masam bikuasa inŭh Kaam! Munki masam bās inŭh pinyibake Mai!

¹⁴Pritah Mai inŭh bidigŭng di pinŭnggŭn ngga pinyitŭnggŭn; pinyirindu ngga pinyitŭtŭd inŭh tatŭng darŭm sopŭrŭg pingandai Mai.

¹⁵Sanang inŭh daya adi nyambah Kaam ngga ragu, adi udip darŭm jawa mandis Mai!

¹⁶Sabab Kaam ngara pawŭn ndi andu andu, ka ngara muji Kaam amai pinyikana Mai.

¹⁷Kaam nggen di kieh pimanang; darŭm pinyirindu Mai Kaam bada kieh mijog tagap.

¹⁸Kaam, O TUHAN, mien pinyigrindung ami; Kaam, Tapa Kudus Israel, nggen di kieh raja.

¹⁹Jah di tika adi keya ka darŭm pŭmŭh, Kaam nang di urun urun Mai adi tŭtŭd, “Aku turung soldadu adi timagah; Aku nggen takta di sianŭ adi Aku mien so dupan bara daya.

²⁰ Aku mbŭh bada urun Ku David jadi raja darŭm Aku nginyo ayŭh ngga inyo kudus.

²¹Pinyibake Ku re siraru agi ngga ayŭh, kuasa Ku re bada ayŭh bake.

²²Pinganyu-i dŭh re tungang rawan ayŭh; daya adi arap dŭh re tungang ngarah ayŭh.

²³Aku re pirandŭk bara pinganyu-i ka siŭ barang naan adi tiru di ayŭh.

²⁴Aku re rindu ayŭh ka nundok di ayŭh; Aku re bada ayŭh siraru manang darŭm biperang.

²⁵Aku re bada bayah pritah-i so rawŭt Mediterranean ndŭg Yang Euphrates.

²⁶Ayŭh re nang di Aku, ‘Kaam inŭh Sama ku ngga Tapa ku; Kaam inŭh pinyigrindung ku ngga pinyikudip ku.’

²⁷ Aku re bada ayŭh jadi anak pinuai Ku, raja adi siabo bās raja.

²⁸Aku re siraru kingat janji Ku di ayŭh, ka simanya Ku ngga ayŭh re tan ndŭg situi tui.

²⁹Takta-i re tan mun rangit; sesang-i re siraru jadi raja.

³⁰“Pak kambŭi sesang-i dŭh tunda ukum-adat Ku ka dŭh udip nanyam ka pesan Ku,

³¹kambŭi ngara tirawan atur-adat Ku ka dŭh sita Pinyipesan Ku,

³²Aku re ngukum ngara amai dosa ngara; Aku re bada ngara sangsara amai sarah ngara.

³³Pak Aku dŭh ko rindu David bait kambŭt janji Ku di ayŭh.

³⁴Aku dŭh re kambŭt simanya Ku ngga ayŭh bait tarik pari janji Ku ngga ayŭh.

³⁵“Ndi sidah yŭn adu adu Aku muko bijanji ngga adŭn Ku adi kudus: Aku dŭh re kadong David.

³⁶Ayŭh re adu adu biyŭn sesang, ka Aku re kingat jaga pinyipritah-i sitŭkŭd batŭh andu agi.

³⁷Pinyipritah-i re mun mun-i mun buran di rangit, saksi adi tŭtŭd di rangit.”

³⁸Pak Kaam baji di raja adi Kaam mbŭh mien; Kaam mbŭh tingge ka tirawan ayŭh.

³⁹Kaam mbŭh matŭd simanya Mai ngga urun Mai ka taran makota-i di tawang.

⁴⁰Kaam mbŭh nyirubuh sindung kupo-i ka tandah kuta-i rubuh.

⁴¹Sopŭrŭg adi murah naku kayuh-i; sopŭrŭg rasū-i tawŭh ayŭh.

⁴²Kaam mbŭh nggen pimanang di pinganyu-i; Kaam mbŭh bada sopŭrŭg ngara pawŭn.

⁴³Kaam mbŭh bada sinyata-i dŭh biguna ka tandah ayŭh arah darŭm biperang.

⁴⁴Kaam mbŭh kadi so ayŭh sikud pinyipritah-i[158] ka pitumbang takta-i ka tana.

⁴⁵Kaam mbŭh bada ayŭh tuuh diŭ so tipuh-i ka bada ayŭh sangsara darŭm mangŭh.

⁴⁶TUHAN, re Kaam sukan kah adŭp Mai ndŭg situi tui? Ndŭg sinde baji Mai bijagu mun apui?

⁴⁷Ingat munki masam purok-i udip ku; ingat adŭp Mai adi napa kieh jadi manusia adi bisa kabŭs!

⁴⁸Asi bisa udip ka dŭh kabŭs? Simuki manusia re bisa pijo adŭp-i so rubang kubur?

⁴⁹TUHAN, diki tandā tandā pinyirindu Mai adi dawŭ? Diki janji adi Kaam mbŭh ndai di David?

⁵⁰Dŭh kambŭt munki aku, urun Mai, dog pimangŭh, munki aku nan pangu[159] daya adi dŭh puan Tapa.

⁵¹Pinganyu Mai pimangŭh raja adi Kaam mbŭh mien, O TUHAN! Ngara pimangŭh ayŭh di barang yŭn ayŭh panu.

⁵²Puji ka TUHAN ndŭg situi tui! Amen! Amen!