Read Biatah Bidayuh MAZMUR 9 Bible Online

MAZMUR 9 - Biatah Bidayuh bible

MAZMUR 9

¹[12] Aku re muji Kaam, TUHAN, ngga siabo atin ku; aku re kidaan sopŭrŭg kayuh-saruh adi mbŭh Mai ndai.

²Aku re biragu ngga gaŭn sabab Kaam, Aku re biragu muji Kaam, Tapa Bisa-pŭrŭg.

³Bara pinganyu ku bu pari kan Kaam nandŭng; ngara tumbang ka kabŭs.

⁴Kaam dŭh marad pak tŭnggŭn di itong Mai, ka Kaam mbŭh kiren nang aku dŭh sarah.

⁵Kaam mbŭh ngukum daya adi dŭh puan Kaam ka pirabur daya adi ginaka; ngara re dŭh tia dog ingat.

⁶Bara pinganyu ami mbŭh rarap. Kaam mbŭh pirabur kupo kupo ngara, ka ngara mbŭh dog kambŭt.

⁷Pak TUHAN inŭh raja ndŭg situi tui; ka-I pijog takta-I yŭn nggen bisara.

⁸Ayŭh mritah ong ngga pinŭnggŭn; Ayŭh tingga arap kana bangsa bangsa ngga pinyitŭnggŭn.

⁹TUHAN inŭh pinyigrindung daya adi dog kinanyuh, yŭn adi pagŭng di tika susah.

¹⁰Daya adi puan Kaam, TUHAN, re sabah di Kaam; Kaam dŭh tagan tadŭ daya adi mandŭg ka Kaam.

¹¹Biragu puji ka TUHAN, adi mritah di Zion! Kidaan di barang bangsa kayuh adi mbŭh-I ndai!

¹²Tapa ingat ngara adi sangsara; Ayŭh dŭh kambŭt sien ngara, ka Ayŭh ngukum daya adi ndai sarah di tunduh ngara.

¹³Masi di aku, O TUHAN! Tingga sangsara ku adi pinganyu ku ndai di tunduh ku! Pirupas aku so pinyikabŭs, O TUHAN,

¹⁴isa aku muji Kaam di sirung jawin daya Jerusalem ka kidaan di ngara sopŭrŭg kayuh kana adi Kaam mbŭh ndai. Aku re gaŭn ginanyŭn sabab Kaam mbŭh nyiramat aku.

¹⁵Daya adi dŭh puan Kaam mbŭh kareh rubang ka rabu dieh; ngara mbŭh dog jarat adŭp ngara.

¹⁶TUHAN mbŭh pinandŭng adŭp-I ngga ukum adat-I adi tŭnggŭn, ka daya ginaka dog nyijarat pingandai adŭp ngara.

¹⁷Pinyikabŭs inŭh pimungan sopŭrŭg daya ginaka, pimungan sopŭrŭg adi tirawan Tapa.

¹⁸Daya sirata dŭh re ari dog nyibireu; pingarap daya ramah dŭh re dog pirusak adu adu.

¹⁹Mandŭg, TUHAN! Dŭhnyah tandah arap manusia mirarat! Taban ka sirung jawin Mai daya adi dŭh puan Kaam ka kidaan sarah ngara.

²⁰Bada ngara taru, O TUHAN; bada ngara puan nang adŭp ngara adŭ-i manusia adi bisa kabŭs.