Read Biatah Bidayuh MAZMUR 94 Bible Online

MAZMUR 94 - Biatah Bidayuh bible

MAZMUR 94

¹TUHAN, Kaam inŭh Tapa adi ngukum; pinandŭng baji Mai!

²Kaam inŭh arang sopŭrŭg; makat ka nggen di daya adi sambuh baras ngara!

³Ndŭg sinde daya ginaka gaŭn? Ndŭg sinde, TUHAN?

⁴Ndŭg sinde daya sarah sambuh ka mingangŭn pasar pingandai sarah ngara?

⁵Ngara bada asur daya Mai, TUHAN; ngara kinanyuh ngara adi mbŭh jamai.

⁶Ngara siŭ dayung uban ngga anak tumang, ka siŭ daya saruh adi rŭŭ di tarun tana ngara.

⁷Ngara nang, “TUHAN dŭh kiris ata; Tapa Israel dŭh kiris pingandai ta.”

⁸Daya ku, simuki angān mbŭh raru budo? Sinde angān re birajar?

⁹Tapa ndai kajit ta -- tatu Ayŭh dingah. Ayŭh ndai batŭh ta -- tatu Ayŭh kiris.

¹⁰Ayŭh pirangi bangsa bangsa -- tatu Ayŭh ngukum ngara.[162] Ayŭh inŭh guru sopŭrŭg -- tatu Ayŭh biyŭn pinyipuan.

¹¹ TUHAN puan kayuh adi ngara pikir; Ayŭh puan munki masam dŭh biguna pikir-kira ngara.

¹²TUHAN, sanang inŭh ngara adi Kaam mbŭh ngajar, ngara adi Kaam mbŭh ngajar ukum-adat Mai!

¹³Kaam nggen di ngara rŭŭ so tipuh susah ndŭg ka rubang dog kareh ngga mirakap daya adi ginaka.

¹⁴TUHAN dŭh re tagan daya-I; Ayŭh dŭh re tingge ngara adi Ayŭh dapu.

¹⁵Pinyitŭnggŭn re pari ka yŭn bisara, ka sopŭrŭg daya tŭnggŭn re batu-i.

¹⁶Asi re mijog yŭn ku rawan daya ginaka? Asi re sua ngga aku rawan daya adi ndai sarah?

¹⁷Kambŭi TUHAN dŭh turung aku, taŭn mbŭh aku rikas ndŭg ong daya kabŭs.

¹⁸Aku nang, “Aku rabu”; pak pinyirindu Mai, O TUHAN, agi digŭng aku.

¹⁹Kan aku ngingen ka susah, Kaam nyaduh aku ka bada aku gaŭn.

²⁰Kaam dŭh bigaur ngga akim adi arap, adi nyibatur kayuh adi sarah,

²¹adi bipekat rawan daya adi kana ka nggen ukum kabŭs di daya adi dŭh sarah.

²²Pak TUHAN ngibān aku; Tapa ku grindung aku.

²³Ayŭh re ngukum ngara amai pingandai ginaka ngara ka pirabur ngara amai dosa ngara; TUHAN adi Tapa ta re pirabur ngara.