Read Biatah Bidayuh MAZMUR 95 Bible Online

MAZMUR 95 - Biatah Bidayuh bible

MAZMUR 95

¹Mandŭg, ja ata muji TUHAN! Ja ata biragu ngga gaŭn yŭn Tapa, adi grindung ata!

²Ja ata mandŭg ka sirung jawin-I ngga trima kaseh ka ngga gaŭn biragu ragu puji.

³Amai TUHAN inŭh Tapa Bisa-pŭrŭg, raja adi bikuasa di tunduh sopŭrŭg tapa.

⁴Ayŭh mritah ndi ong ong, so rasan tang ndŭg darŭd adi siabo bigatung.

⁵Ayŭh nguasa rawŭt, adi-I napa; tarun tana gŭh, adi adŭp-I mbŭh pijadi.

⁶Mandŭg, ja ata mutu ubak ta ka nyambah Ayŭh; ja ata sidikang di sirung jawin TUHAN, pinapa ta!

⁷ Ayŭh inŭh Tapa ta; ata inŭh daya adi Ayŭh kingat, kaban biri adi-I sita. Dingah kayuh adi-I nang andu ati:

⁸ “Dŭhnyah baking, mun tayung-babuk ngan di Meribah, mun ngara andu anŭ di tarun tana-pajam di Massah.

⁹Diginŭ ngara suba Aku, an puan asi Aku, sunggu ngara mbŭh kiris kayuh adi Aku mbŭh ndai yŭn ngara.

¹⁰Pat puru sawa Aku tiru di turap anŭ. Aku nang, ‘Ruai dŭh tŭtŭd ngara! Ngara abah tunda pesan Ku.’

¹¹ Aku baji ka bipayu; ‘Angān dŭh re mŭrŭt tarun tana anŭ di yŭn Aku nggen di angān rŭŭ-paya.’ ”