Read Biatah Bidayuh PITAS 1 Bible Online

PITAS 1 - Biatah Bidayuh bible

PITAS 1

¹ Pitas Solomon, anak David adi raja Israel.

²Ati inŭh pitas adi re turung angān natŭng pinyibijak ka pinyitayan adi kana, ka mirati piminyu pinganang adi tŭrŭp rati-i.

³Pitas ati dapŭd ngajar angān udip pitar ka udip jujur, tŭnggŭn, ka batur.

⁴Pitas ati dapŭd bada daya adi dŭh sukup birakar jadi birakar, ka ngajar daya adi mara jadi daya pitar pandai.

⁵Pitas ati dapŭd nambah pinyipuan daya adi bijak ka nggen pinyiruton di daya adi bigatung sikura-i,

⁶isa ngara dapŭd mirati rati tŭrŭp pitas ngga pinyusah adi daya bijak nyuse.

⁷ An biyŭn pinyibijak, nŭŭh dŭh siŭn dŭh an diŭ stabi ka taru di TUHAN.[1] Daya adi budo bawa dŭh biyŭn stabi di pinyibijak ka abah-i birajar.

⁸Nak, nakit dingah kayuh adi sindŭ sama mu kidaan di kuu.

⁹Ajar ngara re ngubah urah mu bada kana, keya ka bubok adi ramus puan kah kukong ngubah ayong mu bada ramus.

¹⁰Kan daya bidosa piripong kuu, nak, dŭhnyah kuu ramah.

¹¹Nyamtadar-i ngara nang, “Ja siŭ daya! Ja nyerang daya adi dŭh sarah, ngga ata nyipawŭn adŭp ta!

¹²Ngara udip buang bua sanang kan ata dapŭd ngara, pak ngara re kabŭs ripas ata nyiraja ngara!

¹³Ata re dapŭd bagŭ masam kayuh grua ka ngisi ramin ta ngga kayuh sirapas!

¹⁴Ja sua ngga kieh, ka ata re samah kayuh adi ata naku.”

¹⁵Dŭhnyah tunda daya adi mun anŭ, nak. Pijo adŭp mu so ngara.

¹⁶Ngara dŭh tan dŭh ndai kayuh arap. Ngara taŭn ari mbŭh sidia an siŭ daya adŭ.

¹⁷Dŭh inŭh kana nŭŭh tŭŭn jarat di sirung jawin manuk adi an nŭŭh nakap,

¹⁸pak daya adi mun anŭ taŭn mbŭh tŭŭn jarat ngga kudog ka siŭ adŭp-i.

¹⁹Daya adi jiroh utung ngga pinyiganas re bayar ngga asŭng adŭp-i.

²⁰ Dingah! Pinyibijak bagan di aran raya ka di passar,

²¹bagan bana di tiban-bās kupo ka di tadŭ yŭn daya mandŭg tikuruk:

²²“Daya budo! An tian-ki dinge angān budo? An tian-ki dinge angān ngamun pinyipuan? Sinde angān re birajar?

²³Dingah kan aku nyara ngajar angān; aku re nggen di angān pinyitayan adi kana ka samah pinyipuan ku ngga angān.

²⁴Mbŭh tian-ti aku bagan angān, ngaja angān, pak angān abah dingah. Angān dŭh piduri aku.

²⁵Angān mbŭh nyibireu sopŭrŭg pinyitayan ku ka abah bada aku nyara ngajar angān.

²⁶Jadi kan angān dog nyatŭk pinyusah, aku re tawŭh angān. Aku re mijŭh angān kan angān dog nyatŭk pinyusah bās.

²⁷Kan-i mandŭg ka angān mun sabak ribut, taban sabak bisā pinyusah, angān re naman adŭp ngan buang sangsara.

²⁸Nganŭ angān re bagan pinyibijak, pak aku re dŭh nam. Angān re jiroh aku di barang yŭn, pak angān dŭh re dapŭd aku.

²⁹Angān bŭn biguna di pinyipuan ka marar abah tunda pinganang TUHAN.

³⁰Angān bŭn raan pinyitayan ku puan kah nakit dingah kan aku nyara ngajar angān.

³¹Jadi meh, angān re trima nasip adi situgu ngga kraja pingandai ngan, ka gŭh re kinyam serang kraja pingandai adŭp ngan anŭ.

³²Daya adi gibayuh sukup puan ka mirati kayuh, kabŭs sabab ngara tirawan pinyibijak. Daya budo dog siŭ adŭp urah ngara adi dŭh raan mbit bat di kayuh.

³³Pak daya adi dingah aku re siramat, ka mating pada-i re taru.”