Read Biatah Bidayuh PITAS 12 Bible Online

PITAS 12 - Biatah Bidayuh bible

PITAS 12

¹Ngara adi rindu pinyipuan raru raan dog ngajar kan ngara sarah. Daya adi abah dog ngajar taŭn-i budo.

²TUHAN munos asŭng-I di daya adi kana, pak ngukum ngara adi bisatur ndai kayuh adi arap.

³Daya dŭh dapŭd siramat so udip ginaka, pak daya tŭnggŭn inŭh keya ka tŭngŭn kayuh adi tagap buang tŭrŭp uat pinamai-i.

⁴Sawŭn adi kana inŭh yŭn banŭh mingangŭn ka gaŭn; pak sawŭn adi pimangŭh banŭh inŭh keya ka adām darŭm turang, di banŭh-i.

⁵Daya adi jujur re kana ngga kuu; pak daya ginaka kaŭs-i raan nipu kuu.

⁶Pinganang daya adi ginaka siŭ, pak pinganang daya tŭnggŭn nyiramat daya.

⁷Daya ginaka re rabu ka re dŭh biyŭn sesang, pak rawang daya tŭnggŭn re biyŭn sesang.

⁸Kambŭi kuu pitar, kuu re dapŭd puji; kambŭi kuu budo, daya re ngamun kuu.

⁹Kana dŭ nŭŭh jadi daya saja adi nyiraja jiroh man, so nŭŭh ngakar jadi daya bās pak sibŭrŭk.

¹⁰Daya adi kana kingat dāng ngara, pak daya ginaka gaok ngga tung ngara.

¹¹Tukang teya adi gagah nyiraja biyŭn sukup pinguman, pak daya adi saat jam di kraja adi dŭh biguna inŭh budo.

¹²Kayuh adi daya ginaka raan kaŭs-i pingandai adi arap, pak daya tŭnggŭn inŭh keya ka tŭngŭn kayuh adi tagap ka buān.[14]

¹³Daya ginaka dog mirakap pinganang adŭp ngara, pak daya adi kana nyiramat adŭp ngara so pinyusah.

¹⁴Upah mu bisangan di pinganang mu ngga di pingandai mu; kuu re trima baras nimun patut kuu trima.

¹⁵Daya budo ari pikir adŭp-i batur. Daya bijak dingah pinyitayan.

¹⁶Kan daya budo tuas, ayŭh rasu kiren-i di daya. Daya adi bijak dŭh mbit bat kan dog pimangŭh.

¹⁷Kan kuu kidaan kayuh adi sawŭ, anŭ inŭh taksi adi batur, pak pinganang kadong inŭh taksi adi sarah.

¹⁸Pinganang adi nyimau dog ruān bisa tabŭk atin daya mun pedang, pak pinganang bijak inŭh keya ka uri adi bisa pibua.

¹⁹Pinganang kadong dŭh tan tui, pak pinyawŭ tan tui.

²⁰Pikir daya adi arap inŭh puno ngga tipu, pak ngara adi nyiraja yŭn pinyikana re gaŭn.

²¹Kayuh arap dŭh re nyatŭk daya tŭnggŭn, pak daya ginaka ari dog nyatŭk pinyusah.

²²TUHAN tiru di daya pingadong, pak munos asŭng di ngara adi ingat janji-i.

²³Daya bijak pirŭŭ adŭp-i pasar kayuh adi puan-i, pak daya budo piranggah budo bawa adŭp-i.

²⁴Gagah nyiraja bada daya bikuasa; udip tibanga bada daya jadi urun.

²⁵Pinyipagan bada kuu susah, pak pinganang mandis nyanang atin mu.

²⁶Daya tŭnggŭn kayak jerā-i, pak aran daya ginaka kinanyap daya.

²⁷Kambŭi kuu tibanga, kuu dŭh re dapŭd kayuh adi kuu gruwŭn, pak kambŭi kuu bandar nyiraja, kuu re dapŭd raru bagŭ buat-rata.[15]

²⁸Pinŭnggŭn inŭh aran nuju udip; udip ginaka[16] inŭh aran nuju pinyikabŭs.