Read Biatah Bidayuh PITAS 14 Bible Online

PITAS 14 - Biatah Bidayuh bible

PITAS 14

¹Ramin arŭn dog ndai so pinyibijak dayung, pak dog nyirubuh so budo bawa adŭp-i.

²Jujur meh ka kuu re kiren adŭp mu taru ka stabi di TUHAN; dŭh jujur, ka kuu re kiren adŭp mu dŭh stabi di Ayŭh.

³Daya budo adi sambuh dog ukum sabab-i minyu rabis so patut, pak pinganang daya adi bijak grindung adŭp-i.

⁴Panggau mu re dŭh brisi kambŭi kuu dŭh biyŭn sapi ngga majak; pak-i re puno ngga gandom kambŭi kuu biyŭn sapi.[17]

⁵Saksi adi bisa dog sabah ari kidaan kayuh adi sawŭ, pak saksi adi dŭh bisa dog sabah ari kadong.

⁶Daya adi sambuh dŭh dapŭd jadi bijak, pak daya adi pitar sanang birajar.

⁷Pijo adŭp mu so daya adi budo; ngara dŭh biyŭn kayuh re-i ngajar di kuu.

⁸Mani daya adi pandai bijak? Sabab ayŭh puan kayuh adi an-i ndai. Mani daya adi budo tibudo bada budo bawa adŭp-i? Sabab ayŭh kaŭs-i pikir adŭp-i puan.

⁹Daya budo dŭh piduri bait-i ngara bidosa ka dŭh, pak daya kana raan dosa ngara dog apun.

¹⁰Pinyigaŭn mu inŭh tung adŭp mu; pinyusah mu mbŭh tung adŭp mu gŭh. Mating daya bŭkŭn bisa sua kinyam-i.

¹¹Ramin daya kana babŭ mijog ripas ramin daya arap mbŭh rubuh.

¹² Aran adi kuu pikir batur, pinŭbŭn-i bisa nuju pinyikabŭs.

¹³Tawŭh bisa sukan atin susah. Kan pinyigaŭn mating tia, pinyusah taŭn agi diginŭ.

¹⁴Daya arap re trima baras pingandai arap ngara. Daya kana re trima upah yŭn pingandai kana ngara.

¹⁵Daya budo sabah barang masam kayuh; daya bijak kingat sakong ngara.

¹⁶Daya bijak nakit kingat adŭp-i buang pijo adŭp-i so pinyusah, pak daya budo dŭh nakit kingat adŭp-i buang paŭh girungos ndai kayuh.

¹⁷Daya adi udah baji ndai urah-i ngga budo; daya adi bijak pirŭŭ adŭp-i.[18]

¹⁸Daya adi dŭh puan ani ani trima upah budo bawa-i, pak daya adi pandai dog ngupah ngga pinyipuan.

¹⁹Daya adi arap re mutu ubak ngara ka daya tŭnggŭn yŭn bandar mite masi.

²⁰Mating daya rindu daya sirata, ndŭg ka rasū ngara simŭnŭ gŭh ngga ngara, pak daya kaya biyŭn bagŭ jerā.

²¹Kambŭi kuu raan sanang, mandis ngga daya sirata; bidosa nŭŭh ngamun daya.

²²Kuu re dog sabah ka dog stabi kambŭi kuu ndai pingandai kana; kambŭi kuu ndai pingandai arap, kuu mbŭh sarah.

²³Nyiraja ka kuu re dapŭd utung; kambŭi kuu guru kamati kamanŭ kirakar, kuu re sirata.

²⁴Daya bijak dog muji amai pinyibijak ngara, pak daya budo dog puan amai budo bawa ngara.

²⁵Saksi nyiramat daya kan ayŭh kidaan kayuh adi sawŭ; kan ayŭh kadong, ayŭh jua daya.

²⁶Stabi buang taru di TUHAN bada daya ngga rawang-i pagŭng ka siramat.

²⁷Kambŭi kuu raan pijo adŭp mu so pinyikabŭs, stabi ka taru meh di TUHAN amai Ayŭh inŭh atak udip.

²⁸Bās raja bisangan di kiang daya adi ayŭh mritah; ayŭh au-tarun kambŭi dŭh biyŭn rayat.

²⁹Kambŭi kuu pirŭŭ adŭp mu, kuu bijak, pak kambŭi kuu udah baji, anŭ mbŭh kiren munki masam budo-i kuu.

³⁰Pikir adi tanang bada pŭrŭng ganan bua sanang, pak atin sina inŭh keya ka turang adi madam.

³¹Kambŭi kuu kinanyuh daya sirata, kuu nggen mangŭh di Tapa adi napa ngara; pak mandis ngga daya sirata mbŭh tibiat daya adi nyambah Tapa.

³²Daya ginaka pirabu adŭp-i ngga pingandai arap, pak daya adi kana dog grindung sabab atin bisig ngara.

³³Pinyibijak inŭh di barang pikir-kira daya adi pitar; daya adi budo dŭh puan ani ani[19] pasar pinyibijak.

³⁴Daya tŭnggŭn bada bangsa bās; dosa nggen mangŭh di bangsa.

³⁵Raja munos asŭng-i di bara pinurung-i adi pandai ndai kraja, pak ngukum ngara adi dŭh pandai ndai kraja.