Read Biatah Bidayuh PITAS 15 Bible Online

PITAS 15 - Biatah Bidayuh bible

PITAS 15

¹Pinyinam adi duduh kadud baji; pak pinyinam adi kasar, nambah.

²Kan daya bijak minyu, ngara bada pinyipuan tarik atin daya, pak pinganang daya budo kaŭs-i pinganang au-tarun.

³TUHAN kiris ani ani adi jadi di barang yŭn; Ayŭh nyibatŭh ata, bait ata ndai kayuh kana puan kah ndai kayuh arap.

⁴Pinganang mandis nggen udip, pinganang mangah kandam.

⁵Daya adi budo nyibireu ajar sama-i; daya adi bijak trima ajar kan sama-i nyara ngajar ayŭh.

⁶Pinyikaya daya tŭnggŭn pagŭng, pak pinyikaya daya ginaka manyap kan tipuh jera mandŭg.

⁷Kayuh adi daya bijak nang ngajar pinyipuan di daya; kayuh adi daya budo nang, dŭh.

⁸TUHAN munos asŭng kan daya adi kana bidua, pak tiru di sadis adi daya ginaka taban ka Ayŭh.

⁹TUHAN tiru di pimudip daya adi arap, pak rindu ngara adi ndai kayuh adi batur.

¹⁰Kambŭi kuu ndai kayuh adi sarah, kuu re bandar dog ukum; kuu re kabŭs kambŭi kuu abah dog ngajar.

¹¹Sirabi ka ong daya adi mbŭh kabŭs dŭh gŭh dapŭd sukan so TUHAN kayuh adi jadi diginŭ; simuki meh daya re tungang sukan pikir-kira ngara so Tapa?

¹²Daya adi gambung abah dog ngajar; ngara bŭn mite pinyitayan so ngara adi bijak.

¹³Kan daya pawŭn, ngara tawŭh, pak kan susah, ngara piasi adŭp-i.

¹⁴Daya adi pitar raan birajar, pak daya budo puas ngga budo bawa adŭp-i.

¹⁵Pimudip daya sirata marar jera, pak daya adi pandai nyanang asŭng-i marar sanang udip.

¹⁶Kana dŭ udip sirata ka taru di TUHAN so nŭŭh udip kaya ka dog pinyusah.

¹⁷Kana dŭ man dawŭn kudos ayō daya adi nŭŭh rindu so nŭŭh man dagin sidi di tarun yŭn adi agi pinyitiru.

¹⁸Daya adi udah baji nimbur kaii, pak daya adi sais baji taban damai.

¹⁹Kambŭi kuu tibanga, kuu re jera di barang yŭn, pak kambŭi atin mu tŭnggŭn, kuu dŭh re susah.

²⁰Anak adi bijak bada pimas-i sanang. Daya adi budo ngamun sindŭ-i.

²¹Daya budo sanang asŭng-i ngga budo bawa adŭp-i, pak daya bijak ndai kayuh adi batur.

²²Kraja pingandai mu mujur kambŭi kuu tunda bagŭ pinyitayan; kambŭi dŭh, kraja mu re dŭh mujur.

²³Nggen pinganang adi batur di tika adi batur, bada asŭng sanang!

²⁴Daya bijak panu aran adi maad nuju udip, dŭh aran adi mūn nuju pinyikabŭs.

²⁵TUHAN re nyirubuh ramin daya adi sambuh, pak Ayŭh re grindung tana dayung uban.

²⁶TUHAN tiru di pikir-kira adi arap, pak Ayŭh munos asŭng-I di pinganang adi kana.

²⁷Kambŭi kuu suba an dapŭd utung so kraja pingandai adi sarah, kuu re bada rawang mu dog pinyusah. Dŭhnyah trima suap ka kuu re tui udip.

²⁸Daya kana bipikir diŭ so-i nam. Daya arap rikas nam, pak-i nimbur pito.

²⁹Kan daya kana bidua, TUHAN dingah; pak Ayŭh nyibireu ngara adi arap.

³⁰Jawin adi gaŭn nyanang asŭng, ka agah adi kana bada nŭŭh pawŭn.

³¹Kambŭi kuu trima ajar kan kuu dog nyara, kuu bijak.

³²Kambŭi kuu abah birajar, kuu kandam adŭp mu. Kambŭi kuu trima ajar kan daya nyara ngajar kuu, kuu re jadi rabis bijak.

³³Taru ka stabi di TUHAN ngajar kuu pinyibijak. Kuu dŭh siŭn dŭh an pirapat adŭp mu kambŭi an dog stabi.