Read Biatah Bidayuh PITAS 16 Bible Online

PITAS 16 - Biatah Bidayuh bible

PITAS 16

¹Ata bisa bisatur, pak Tapa inŭh adi nggen sikasŭn pinganang.[20]

²Kuu bisa nang barang masam kayuh adi kuu ndai batur, pak TUHAN adi puan pinŭtŭn atin mu.

³Mite TUHAN nyiberkat kayuh adi kuu mbŭh bisatur an ndai, ka kuu re mujur di kayuh ndai mu anŭ.

⁴Barang masam kayuh adi TUHAN mbŭh ndai biyŭn pinŭbŭn-i; ka pinŭbŭn daya ginaka inŭh pinyirusag.

⁵TUHAN tiru di barang naan daya adi sambuh; Ayŭh dŭh re bada ngara rupas so dog ukum.

⁶Daya adi sawŭ rindu Tapa re dog apun dosa-i. Tunda pinganang TUHAN ka kayuh arap dŭh re dog kuu.

⁷Kan kuu pimunos asŭng TUHAN, kuu dapŭd bada[21] pinganyu mu jadi jerā.

⁸Kana dŭ trima nisŭ atas-i so aran adi batur, so nŭŭh trima bagŭ so aran adi sarah.

⁹Kuu bisa bisatur ndai kayuh, pak Tapa inŭh adi natu munki kuu pimanu-i.

¹⁰Raja minyu ngga kuasa so Tapa; ka bŭn pinganang-i sarah.

¹¹TUHAN raan timbang ngga takar adi batur, ka dagang an dog ndai ngga atin jujur.

¹²Raja abah tandah pingandai sarah,[22] sabab pinyitŭnggŭn inŭh kayuh adi bada pritah bake.

¹³Raja raan dingah pinganang adi sawŭ ka rindu di ngara adi minyu-i.

¹⁴Daya bijak ngga situngang tungang-i bada raja gaŭn; kambŭi raja baji, agi daya re kabŭs.

¹⁵Jawin raja adi nyirinyak ngga pinyigaŭn inŭh keya ka abun adi taban ujen di tipuh bunga; udip sanang agi diginŭ.

¹⁶Jo kana-i, nŭŭh biyŭn pinyibijak ngga pinyipuan so nŭŭh biyŭn mas ngga pirak.

¹⁷Ngara adi kana panu kadŭg aran adi jo so arap; ngapŭi ingat ani aran kadŭg mu, amai simŭnŭ kuu bisa siramat.

¹⁸Uap-sambuh taban pinyirusag, ka gambung taban pinyirabu.

¹⁹Kana dŭ pirapat adŭp buang udip sirata so nŭŭh jadi ndi so daya adi sambuh ka sua dapu kayuh sirapas ngara.

²⁰Nakit ingat kayuh adi dog ngajar di kuu, ka kuu re mujur; sabah di TUHAN ka kuu re sanang.

²¹Daya bijak, adi mbŭh sukup mirati tarun, dog puan amai pinyimirati-i. Makin ayŭh siradik minyu, makin ayŭh tungang bada daya tunda pinganang-i.

²²Pinyibijak inŭh atak udip di daya adi bijak, pak ngajar daya adi budo inŭh saat jam.

²³Daya adi bijak bipikir diŭ so ngara minyu; kayuh adi ngara nang inŭh kayuh adi raru daya an tunda.

²⁴Pinganang adi mandis inŭh keya ka ju banyis; sidi di baba ka kana yŭn pŭrŭng.

²⁵ Aran adi kuu pikir aran adi batur, bisa jadi aran nuju pinyikabŭs.

²⁶Asŭng adi raan man bada daya adi nyiraja bakar bandar nyiraja, amai ayŭh raan pibisoh adŭp-i.

²⁷Daya adi arap jiroh aran ngga kandam daya; ka pinganang ngara mbŭh keya ka jireb apui.

²⁸Daya adi ginaka inŭh adi ngitong daya; ngara ndai pito ka bada daya bikaii.

²⁹Daya adi ganas nipu jerā ngara ka taban ngara ka yŭn pinyirusag.

³⁰Jaga adŭp mu so daya adi tawŭh ka main batŭh di punok mu; ngara biyŭn pinŭtŭn adi arap.

³¹Udip tui inŭh upah daya tŭnggŭn; ubok buda inŭh makota bragah-i.

³²Kana dŭ nŭŭh sabar buang bikuasa. Kana dŭ bikuasa di tunduh adŭp nŭh so bikuasa di tunduh sopŭrŭg kupo.

³³Daya taran dadu yŭn puan pinyiraan Tapa, pak adŭp Tapa inŭh adi natu pinyinam.