Read Biatah Bidayuh PITAS 18 Bible Online

PITAS 18 - Biatah Bidayuh bible

PITAS 18

¹Daya adi nyadi adŭp-i inŭh daya adi rada adŭp-i sadi; ngara nyakar sopŭrŭg kayuh adi daya bŭkŭn puan nang batur.

²Daya budo dŭh piduri bait-i mirati puan kah dŭh kayuh; anŭ adi ayŭh raan inŭh kiren pinyipuan adŭp-i.

³Dosa ngga mangŭh dŭh bisa jo so dingan-i. Ndai sarah ka kuu dog pimangŭh.

⁴Pinganang daya bisa jadi atak pinyipuan, tŭrŭp mun rawŭt, tibŭn mun piin sungi adi aman.

⁵Taŭn dŭh batur nŭŭh ngarun daya adi sarah ka kinanyuh daya adi dŭh sarah.

⁶Kan daya budo nimbur karit, ayŭh mite pukong.

⁷Kan daya budo minyu, ayŭh pirusak adŭp-i; ayŭh kudog adŭp-i ngga piminyu adŭp-i.

⁸Ngitong daya taŭn sidi -- gagā daya tŭrŭn-i!

⁹Daya tibanga samah arap-i ngga daya adi gagā pirusak.

¹⁰TUHAN inŭh keya ka tawā adi tagap, di yŭn daya tŭnggŭn dapŭd bisukan.

¹¹Daya kaya, pikir pinyikaya ngara dapŭd grindung ngara mun sindung adi tagap maning kupo.

¹²Daya adi pirapat adŭp-i dog stabi; daya adi sambuh re binasa.

¹³Daya adi nam diŭ so-i dingah, dŭh-i budo adŭ pak pimangŭh adŭp-i.

¹⁴Pinyiraan mu di udip bisa turung kuu nan andam mu, pak kambŭi pinyiraan mu anŭ mating, manyap inŭh pingarap mu.

¹⁵Daya bijak ari graŭh ka sidia an birajar.

¹⁶Raan kah kuu bidapŭd ngga daya adi bās? Taban pinganggen yŭn-i ka kuu re kinyam ayŭh sanang ngga bidapŭd.

¹⁷Daya adi diŭ minyu di yŭn bisara ari sak adi batur, pak ayŭh re dog suba kan har-i dog pirasa.

¹⁸Kambŭi duwŭh naan daya adi bikuasa nyakar dingan-i di yŭn bisara, taran dadu adŭ tungang ngga nyirase har ngara.

¹⁹Turung madis mu ka ngara re mun sindung kupo grindung kuu,[24] pak kambŭi kuu bikaii ngga ngara, ngara re tŭŭp tiban ka abah bigaur ngga kuu.

²⁰Pinganang adi kuu piruah agi paka-i adi kuu dŭh siŭn dŭh kinyam.

²¹Kayuh adi kuu nang bisa kudip kuu bait siŭ kuu; kuu dŭh siŭn dŭh trima kayuh adi jadi di adŭp mu so piminyu pinganang adŭp mu.

²²Kambŭi kuu dapŭd sawŭn adi kana, nasip mu inŭh kana; anŭ kiren nang TUHAN kana ngga kuu.

²³Kan daya sirata mite kayuh, ngara minyu ngga nakit, pak kan daya kaya nam, ngara minyu ngga kasar.

²⁴Agi jerā adi dŭh tan tui, pak agi jerā adi tŭtŭd dŭ so jurud.