Read Biatah Bidayuh PITAS 2 Bible Online

PITAS 2 - Biatah Bidayuh bible

PITAS 2

¹Birajar kayuh adi aku ngajar di kuu, nak, ka dŭhnyah kambŭt kayuh adi aku kidaan di kuu bada ndai.

²Dingah pinyibijak ka suba mirati-i.

³Sawŭ, bandar mite pinyipuan; mite pinyipitar.

⁴Bandar jiroh-i mun jiroh pirak puan kah rata adi dog sukan.

⁵Kambŭi kuu ndai simŭnŭ, kuu re puan ani rati nŭŭh taru TUHAN ka kuu re mujur darŭm kuu birajar pasar Tapa.

⁶TUHAN inŭh adi nggen pinyibijak; so Ayŭh mandŭg pinyipuan ngga pinyimirati.

⁷Ayŭh turung ka grindung ngara adi tŭnggŭn ka adi jujur.

⁸Ayŭh grindung ngara adi kana ngga daya, ka ngibān ngara adi tŭtŭd di Ayŭh.

⁹Kambŭi kuu dingah aku, kuu re puan kayuh adi tŭnggŭn, ka batur. Kuu re puan kayuh adi patut kuu ndai.

¹⁰Kuu re jadi bijak, ka pinyipuan mu re pimunos asŭng mu.

¹¹Pinyipitar ngga pinyimirati mu grindung kuu

¹²ka pijo kuu so ndai kayuh adi arap, ka re pijo kuu so daya adi kiruyok daya ngga pinganang ngara;

¹³ngara adi tagan pimudip tŭnggŭn ka kadŭg aran karŭm adi puno ngga dosa,

¹⁴ngara adi pimunos adŭp-i ngga pingandai sarah ka pingandai arap adi dŭh biguna,

¹⁵ngara inŭh adi dŭh bisa nŭŭh yŭn bisangan ka adi dŭh bisa dog sabah.

¹⁶Kuu re tungang tak adŭp mu so dayung adi bidosa adi suba an piripong kuu ngga pinganang sidi-i,

¹⁷adi dŭh tŭtŭd di banŭh adŭp-i ka mbŭh kambŭt payu sawan-i.

¹⁸Kambŭi kuu di ka ramin-i, kuu mbŭh kadŭg aran pinyikabŭs. Di kamanŭ inŭh tudu ong daya adi mbŭh kabŭs.

¹⁹Mating daya pari ko dapŭd ayŭh. Daya anŭ dŭh re pari ka aran udip.

²⁰Jadi kuu dŭh siŭn dŭh tunda suto danding daya adi udip tŭnggŭn.

²¹Daya adi tŭnggŭn ngga adi dŭh sarah re rŭŭ di tarun tana ta ati.

²²Pak Tapa re tarik daya ginaka so tarun tana ati ka dimbut daya bidosa so dieh mun dimbut anak kayuh-udip so tana.