Read Biatah Bidayuh PITAS 20 Bible Online

PITAS 20 - Biatah Bidayuh bible

PITAS 20

¹Nok adi bisā bada kuu bidudu ka budo. Budo inŭh daya adi mabuk.

²Taru raja adi baji mun kuu taru singah adi ngŭr; bada ayŭh baji inŭh bada adŭp mu dog siŭ.

³Daya adi budo gagā piguru kaii; kayuh adi dog stabi dŭh siŭn nyindŭk ngara.

⁴Tukang teya adi paŭh tibanga majak tana-i di tipuh adi batur re dŭh biyŭn buwa re-i ngatŭm.

⁵Pikir manusia inŭh keya ka piin darŭm prigi adi tŭrŭp, pak daya adi biyŭn pinyipitar dapŭd nyauk-i.

⁶Barang naan daya minyu pasar munki masam tŭtŭd adŭp-i, pak suba jiroh asi adi sawŭ tŭtŭd!

⁷Bituah inŭh anak anak adi biyŭn sama adi jujur ka adi ndai kayuh adi batur.

⁸Kan raja nggen bisara, ayŭh puan kayuh adi sarah kan ayŭh kiris-i.

⁹Dapŭd kah daya nang pikir-kira atin-i bisig, ka nang dosa-i mbŭh dog taran?

¹⁰TUHAN tiru di daya adi pakai timbang ngga takar adi sirah.

¹¹Anak-anya sirabi ka bisa kiren asi ngara so kraja pingandai ngara; kuu dapŭd puan bait-i ngara kana puan kah arap.

¹²TUHAN mbŭh nggen di ata batŭh ngga kiris ka kajit ngga dingah.

¹³Kambŭi kuu gagā bŭŭs, kuu re jadi sirata. Gagah nŭh kraja, ka kuu re dapŭd bagŭ pinguman.

¹⁴Daya adi tukang miris ari mingungut nang rega kayuh paŭh mbar; pak komŭnŭ ayŭh bu ka minyu sambuh pasar rega adi ayŭh muko nawar.

¹⁵Kambŭi kuu puan kayuh adi nang mu, kuu biyŭn kayuh adi rabis brega so mas puan kah tadŭ tadŭ batuh brega.

¹⁶Budo inŭh daya adi bijanji an dapu tanggong utang daya bŭkŭn; buat-rata adŭp-i patut dog bitan ndu jamen janji-i.

¹⁷Kayuh adi kuu dapŭd ngga aran adi sarah inŭh sidi mun pinguman adi grua, pak dŭh tui kayuh anŭ re keya ka sumat darŭm baba.

¹⁸Mite pinyitayan ka kuu re mujur; dŭhnyah nyurong di tika perang kambŭi gibayuh bisatur.

¹⁹Daya adi pingitong dŭh dapŭd nyikŭn rusia. Pijo adŭp mu so daya adi bibeng.

²⁰Kambŭi kuu mangu pimas mu, pimudip mu re mungan mun prita adi pura di yŭn karŭm.

²¹Rabis sanang kuu dapŭd pinyikaya mu, rabis arap-i re di kuu.

²²Dŭhnyah kuu maras dendam. Sabah di TUHAN ka Ayŭh re turung kuu.

²³TUHAN tiru di daya adi pakai dasin ngga timbang adi sarah.

²⁴TUHAN mbŭh natu aran pimudip ta; simuki meh ata dapŭd mirati aran pimudip adi ata kadŭg?

²⁵Pikir nakit diŭ so kuu bijanji an jugan sadis ka Tapa. Kuu nyesar rai-i te.

²⁶Raja adi bijak re puan asi adi ndai sarah, ka re ngukum daya anŭ ngga dŭh biyŭn masi.

²⁷TUHAN nggen di ata pikir ngga pikir-kira atin; ata dŭh dapŭd bisukan so adŭp ta.

²⁸Raja babŭ bikuasa sitŭkŭd pinyipritah-i batur, tŭnggŭn, ka kana.

²⁹Ata muji pinyibake daya adi mara ka stabi di nyamba amai ubok buda-i.

³⁰Agi tika-i raru mandam re ngubah aran pimudip ta.