Read Biatah Bidayuh PITAS 28 Bible Online

PITAS 28 - Biatah Bidayuh bible

PITAS 28

¹Daya ginaka bikaduh pŭn daya mating tadak ngara, pak daya tŭnggŭn pagan mun singah.

²Kan bangsa bidosa, pimritah-i re rikas bigati. Pak bangsa re bake ka tan tui kambŭi pinguru-i pandai buang bijak.

³Pinguasa adi kinanyuh daya sirata mbŭh keya ka ujen adi bangat pirusak pimuruh.

⁴Kambŭi kuu dŭh sita ukum-adat, kuu mbŭh di parad daya ginaka; pak kambŭi kuu sita ukum-adat, kuu mbŭh rawan daya ginaka.

⁵Daya arap dŭh puan pinyitŭnggŭn, pak ngara adi nyambah TUHAN inŭh adi batur mirati pinyitŭnggŭn.

⁶Kana dŭ jadi daya sirata so nŭŭh jadi daya kaya ngga atin dŭh tŭnggŭn.

⁷Dari mara adi sita ukum-adat inŭh bijak. Daya adi bijerā ngga daya adi dŭh biguna nggen mangŭh di sama-i.

⁸Kambŭi kuu jadi kaya amai tambit anak duit adi paŭh bigatung asŭng-i ka nyibudo daya, pinyikaya mu re di ka daya adi mandis ngga daya sirata.

⁹Kambŭi kuu dŭh sita ukum-adat, dua mu re abah gŭh Tapa dingah.

¹⁰Kambŭi kuu nyibudo daya adi kana bada ndai arap, kuu re rabu ka darŭm jarat adŭp mu. Daya adi dŭh sarah re dog ngupah.

¹¹Daya kaya ari pikir adŭp-i bijak, pak daya adi sirata adi mirati re puan asi ngara.

¹²Kan daya kana jadi bikuasa, sopŭrŭg daya bigawai, pak kan daya arap mritah, daya bisukan.

¹³Kuu dŭh re mujur darŭm pimudip mu kambŭi kuu sukan dosa mu. Ngaku dosa mu ka dŭh tia bidosa, ka Tapa re masi di kuu.

¹⁴Tunda pinganang TUHAN ka kuu re sanang. Kambŭi kuu baking, kuu re binasa.

¹⁵Pinguasa adi ginaka adi kinanyuh daya sirata inŭh keya ka singah adi ngŭr ka keya ka buāng adi nyerang.

¹⁶Pimritah adi dŭh biyŭn pikir inŭh gaok, pak pimritah adi tiru di tipu re mritah tui.

¹⁷Daya adi siŭ daya inŭh kareh kubur adŭp-i ngga sirikas rikas-i. Tandah ayŭh.

¹⁸Daya adi tŭnggŭn re siramat, pak daya adi dŭh tŭnggŭn re dŭh rada adŭp-i rabu.

¹⁹Tukang teya adi gagah dapŭd bagŭ pinguman. Daya adi saat jam re ari sirata.

²⁰Daya tŭnggŭn re udip sanang. Pak daya adi bigaut an jadi kaya, re dog ukum.

²¹Mbit bat ndi parad inŭh sarah. Pak agi akim an ndai sarah ngga dapŭd suap, biar-i nisŭ.

²²Daya adi bidagis girungos an kaya ndŭg ka dŭh rada udip sirata re rikas nyatŭk adŭp-i.

²³Nyara ngajar daya, ka ripas anŭ ayŭh re angan adŭp-i muko dog ngajar rabis so ayŭh angan adŭp-i dog nganju.

²⁴Daya adi nang dŭh sarah naku so pimas inŭh samah arap-i ngga pinaku.

²⁵Atin bidagis taban pinyusah. Kana dŭ nŭŭh sabah di TUHAN.

²⁶Daya adi tunda pikir-kira adŭp-i inŭh budo. Daya adi tunda ajar daya adi bijak re siramat.

²⁷Nggen di daya sirata ka kuu re ari biyŭn kayuh. Kambŭi kuu dŭh piduri daya sirata, bagŭ daya re mangu kuu.

²⁸Daya bisukan kan daya ginaka bikuasa. Pak kan ngara rabu so kuasa, daya tŭnggŭn re mritah dinge di barang yŭn.