Read Biatah Bidayuh PITAS 3 Bible Online

PITAS 3 - Biatah Bidayuh bible

PITAS 3

¹Dŭhnyah kambŭt kayuh adi aku ngajar di kuu, nak. Ari ingat kayuh adi aku kidaan di kuu bada ndai.

²Ajar ku re bada kuu udip tui ka mujur.

³Dŭhnyah ko rindu ka tŭtŭd di Tapa ngga di dingan mu adi samah manusia. Mŭŭng-i di tungo mu; nuris-i di atin mu.

⁴ Kambŭi kuu ndai simŭnŭ, Tapa ngga manusia re munos asŭng di kuu.

⁵Sabah TUHAN ngga siabo atin mu. Dŭhnyah bisangan di kayuh adi kuu pikir kuu puan.

⁶Ingat TUHAN darŭm sopŭrŭg kayuh adi kuu ndai, ka Ayŭh re kiren di kuu aran adi batur.

⁷ Dŭhnyah kuu pikir adŭp mu bijak so adi sibatur-i kuu; tunda pinganang TUHAN ka pijo adŭp mu so pingandai sarah.

⁸Kambŭi kuu ndai simŭnŭ, anŭ re keya ka uri adi kana, pibua tawan mu ka ngurang andam-i.

⁹Jugan anŭ adi siabo kana so pimuruh mu ngga stabi di TUHAN.

¹⁰Kambŭi kuu ndai simŭnŭ, panggau mu re brisi ngga gandom, ka kuu re biyŭn wain rabis so tungang kuu nyikŭn di birit pinyirikŭn mu.

¹¹ Kan TUHAN nyara ngajar kuu, nak, nakit dingah ka trima-i ndu pinyibakan.

¹² TUHAN nyara ngajar ngara adi-I rindu, nimun pimas nyara ngajar anak adi ngara rindu.

¹³Sanang inŭh daya adi bijak -- adi dapŭd pinyimirati.

¹⁴Bagŭ dŭ utung dieh so di pirak ka brega dŭ yŭn mu so mas.

¹⁵Pinyibijak inŭh brega dŭ so batuh brega; mating pinyiraan mu adi bŭkŭn dapŭd ngga danding-i.

¹⁶Pinyibijak nggen udip tui di kuu, samŭn pinyikaya ngga stabi.

¹⁷Pinyibijak dapŭd bada kuu bua sanang darŭm pimudip mu.

¹⁸Ngara adi bijak inŭh sanang; pinyibijak nggen di ngara udip adi sawŭ.

¹⁹TUHAN napa ong ngga pinyibijak-I; ngga pinyipuan-I Ayŭh na rangit di yŭn-i.

²⁰Pinyibijak bada sungi aman ka abun nggen ujen di tana.

²¹Bidigŭng di pinyibijak ka di pinyipitar mu, nak. Dŭhnyah bada-i bu so kuu.

²²Anŭ re nggen di kuu pimudip adi tui buang sanang.

²³Kuu re panu ngga siramat ka dŭh re sikak.

²⁴Kuu dŭh re taru kan kuu di ka ambok mu, ka kuu re bŭŭs rŭrŭ ndi ngarŭm ngarŭm.

²⁵Kuu dŭh re susah pasar pinyusah adi nyirŭgŭh mandŭg, mun anŭ adi mun sabak ribut nyatŭk daya ginaka.

²⁶TUHAN re bada kuu siramat. Ayŭh dŭh re bada kuu rabu ka darŭm jarat.

²⁷Kan daya biguna pinurung, ka kuu dapŭd turung ayŭh, dŭhnyah kuu abah turung.

²⁸Dŭhnyah bada rasū mu kajŭn ndŭg andu sipagi kambŭi kuu dapŭd turung ayŭh andu ati.

²⁹Dŭhnyah ndai kayuh adi re bada rasū mu kinaman; ayŭh rŭŭ ngapid kuu ka sabah di kuu.

³⁰Dŭhnyah ngga dŭh biyŭn pada bikarit ngga daya adi bŭn ida ida ngga kuu.

³¹Dŭhnyah sina di daya ganas puan kah tunda urah ngara,

³²sabab TUHAN tiru di daya adi ndai pingandai arap, pak Ayŭh sabah daya adi tŭnggŭn ka kidaan pikir kira-I di ngara.

³³TUHAN mangu ramin arŭn daya ginaka, pak nyiberkat ramin arŭn daya tŭnggŭn.

³⁴ Ayŭh ngamun daya adi sambuh, pak nggen pinyirasi mandis-I di daya adi pirapat adŭp-i.

³⁵Daya bijak re dapŭd stabi, pak daya budo kaŭs-i re dapŭd mangŭh.