Read Biatah Bidayuh PITAS 30 Bible Online

PITAS 30 - Biatah Bidayuh bible

PITAS 30

¹Ati inŭh pinganang Agur anak Jakeh: “Aku kawŭk, O Tapa, aku mbŭh rarah, aku mbŭh dŭh bigaya.

²Aku mbŭh keya ka dāng, dŭh manusia; aku dŭh biyŭn pikir-kira manusia adi aku patut biyŭn.

³Aku bŭn birajar pinyibijak, ka aku dŭh puan ani ani pasar Tapa.

⁴Asi adi mbŭh maad mūn shorga? Asi adi mbŭh ngagŭm sabak? Puan kah marut piin ngga banang? Puan kah natu baat baat ong? Asi dŭn-i, ka asi anak-i? Dŭh patut kuu dŭh puan!

⁵“Tapa ingat sopŭrŭg janji adi muko-I ndai. Ayŭh inŭh keya ka pinangin yŭn sopŭrŭg adi jiroh pinyigrindung so Ayŭh.

⁶Kambŭi kuu nang Ayŭh agi nang kayuh adi mating-I nang, Ayŭh re ngukum kuu ka nang kuu pingadong.”

⁷Aku mite Kaam, Tapa, bada aku biyŭn duwŭh masam kayuh diŭ so aku kabŭs:

⁸turung aku dŭh kadong daya, ka bada aku dŭh kaya bait sirata. Nggen di aku pinguman adŭ, adi aku biguna.

⁹Kambŭi aku biyŭn bagŭ, kadŭ-i aku nang aku dŭh biguna di Kaam. Pak kambŭi aku sirata, kadŭ-i aku naku ka nggen mangŭh di Tapa ku.

¹⁰Dŭhnyah ngamun daya-gaji di tuan-i, te kuu dog pangu ka sangsara rai-i.

¹¹Agi daya mangu sama-i ka dŭh biyŭn atin trima kaseh di sindŭ-i.

¹²Agi daya pikir adŭp-i bisig pak sibatur-i ayŭh raru kais.

¹³Agi daya pikir adŭp-i raru kana, pak mbŭh jadi raru sambuh!

¹⁴Agi daya adi raru raka, ndŭg ka kinanyuh daya adi sirata ngga daya adi dŭh biyŭn ramin arŭn.

¹⁵Rimŭtŭk biyŭn duwŭh madis anak dayung, ka soduwŭh ngara dog kadŭn “Nggen di aku!” Agi pat masam kayuh adi dŭh bisa puas:

¹⁶ong daya adi mbŭh kabŭs, dayung adi aboh, tana badŭh adi biguna di ujen, ka apui adi minyawit ka barang yŭn.

¹⁷Daya adi ida ida ngga sama-i bait ngamun sindŭ-i adi mbŭh minyamba patut dog man manuk volcha, bait kah batŭh-i dog nukuk manuk kak.

¹⁸Agi pat masam kayuh adi raru mbar aku re mirati:

¹⁹beuh mikabur di rangit, jippŭh bigawang di tunduh batuh, kapar birayar di yun rawŭt, dari ngga dayung biawang.

²⁰Mun ati inŭh sawŭn adi dŭh tŭtŭd: ayŭh tanggah, rasu mamuh, ka ripas anŭ ayŭh nang, “Aku mating ndai kayuh adi sarah!”

²¹Agi pat masam kayuh adi dŭh dog trima di ndi ong ong:

²²urun adi jadi raja, daya budo adi biyŭn barang masam pinguman adi raan-i,

²³dayung adi tiru daya dieh, pak dapŭd banan, daya-gaji dayung adi sirapas hak tuan dayung-i.

²⁴Agi pat masam dāng di ong, sŭ pak raru pitar:

²⁵Subi: ngara dŭdŭt, pak ngara nyikŭn pinguman yŭn tipuh paras.

²⁶Mangis dŭh bake, pak ngara ndai ramin di karu batuh.

²⁷Kadis: ngara dŭh biyŭn raja, pak ngara baris mun soldadu.

²⁸Titek: kuu bisa nakap ngga tangan, pak agi gŭh di istana.

²⁹Agi pat masam kayuh adi tatŭng bās darŭm-i panu:

³⁰singah, bake dŭ so sopŭrŭg dāng ka dŭh taru ani ani;

³¹dari kambing, babang pakat ubak-i bada bigatung, ka raja di sirung jawin rayat-i.[38]

³²Kambŭi kuu agi sambuh ka mbŭh bisatur an ndai arap, guru ka nakit bipikir!

³³Kambŭi kuu kunyuk sisuh, kuu dapŭd batta. Kambŭi mukong undung daya, deya ruah so dieh. Kambŭi kuu kinuas daya, kuu dog har.