Read Biatah Bidayuh PITAS 4 Bible Online

PITAS 4 - Biatah Bidayuh bible

PITAS 4

¹Bara anak ku, dingah kayuh adi sama ngan ngajar di angān. Nakit dingah, ka angān re biyŭn pinyimirati.

²Kayuh adi aku ngajar di angān inŭh kana, ngapŭi ingat sopŭrŭg-i.

³Di andu aku gibabŭ anak daya, anak pimas ku,

⁴sama ku ngajar aku. Ayŭh nang, “Ingat kayuh adi aku nang ka dŭhnyah kambŭt-i. Tunda pinganang ku, ka kuu re udip sanang.

⁵Kuu patut bijak ka pitar! Dŭhnyah kambŭt bait nyibireu kayuh adi nang ku.

⁶Dŭhnyah tagan pinyibijak, ka-i re grindung kuu; rindu-i, ka-i re bada kuu siramat.

⁷Kayuh adi raru biguna adi patut kuu gruwŭn inŭh pinyibijak. Adi patut kuu tadak, adi numbor ndi, inŭh pinyipitar.

⁸Rindu pinyibijak, ka-i re bada kuu bās. Dakŭp-i,[2] ka kuu re dog stabi.

⁹Pinyibijak re jadi makota bragah mu.”

¹⁰Dingah pinganang ku, nak. Mbit bat di kayuh adi aku kidaan di kuu, isa kuu tui udip.

¹¹Aku mbŭh ngajar pinyibijak di kuu samŭn aran pimudip adi batur.

¹²Kambŭi kuu ndai simŭnŭ, kuu dŭh re dog matŭn darŭm kuu panu, ka kuu dŭh re sikak kan kuu bikaduh.

¹³Ari ingat kayuh adi kuu mbŭh birajar. Kayuh adi kuu birajar inŭh pimudip mu, ka nakit jaga-i.

¹⁴Dŭhnyah di ka tarun yŭn adi daya arap ka. Dŭhnyah tunda suto danding daya ginaka.

¹⁵Dŭhnyah ndai-i! Pijo adŭp mu so pingandai adi arap ka bada tŭnggŭn pimanu mu!

¹⁶Daya ginaka dŭh dapŭd bŭŭs adŭ-i ripas ngara muko ndai kayuh sarah. Ngara dŭh nundu sibayuh ngara muko kandam daya.

¹⁷Pingandai ginaka ngga pingandai ganas mbŭh keya ka pinguman ngga piin nok di ngara.

¹⁸Aran adi daya tŭnggŭn kadŭg inŭh keya ka batŭh andu makat, adi dŭ dŭ jawa ndŭg ka-i mbŭh jadi jawa sandu.

¹⁹Aran adi daya ginaka kadŭg, inŭh karŭm mun singarŭm. Ngara rabu, pak dŭh dapŭd kiris kayuh adi ngara sikak.

²⁰Nakit dingah kayuh adi aku nang, nak. Dingah pinganang ku.

²¹Dŭhnyah kuu sikari kari kambŭt-i. Ingat-i ka nyikŭn-i darŭm atin mu.

²²Asi asi adi mirati pinganang ku re udip ngga bua sanang.

²³Nakit kingat munki kuu bipikir; pimudip mu tunda suan pikir-kira mu.

²⁴Dŭhnyah nang kayuh adi dŭh sawŭ. Dŭhnyah kadong daya bait nang kayuh adi kinanyap daya.

²⁵Tingga ka jawin kamaki kuu panu. Dŭhnyah kimat bait tauh; nakit ngga adŭp mu darŭm kuu panu.

²⁶ Bisatur nakit kan re ndai kayuh, ka ani ani adi ndai mu re jadi batur.

²⁷Pijo adŭp mu so pingandai adi arap, pak udip ngga tŭnggŭn. Dŭhnyah suba miriseu so aran adi batur.