Read Biatah Bidayuh PITAS 5 Bible Online

PITAS 5 - Biatah Bidayuh bible

PITAS 5

¹Nakit dingah, nak, pinganang pinyibijak ngga pinyipitar ku.

²Isa kuu pandai ngatur urah rakah mu, ka pinganang mu re kiren kuu biyŭn pinyipuan.

³Bibis sawŭn daya nyibanyis nyam ju banyis ka sium-i jarŭh keya ka inyo kanā,

⁴pak ripas anŭ, mating utung re kuu dapŭd so ayŭh adŭ-i andam ngga sangsara.

⁵Ayŭh re taban kuu ka ong daya adi mbŭh kabŭs; aran adi ayŭh kadŭg inŭh aran pinyikabŭs.

⁶Ayŭh dŭh bijijŭ di aran nuju udip; pak miriseu, ka dŭh rada kayuh adi jadi.

⁷Ngapŭi meh, dingah pinganang ku, angān adi bara anak ku, ka dŭhnyah kambŭt-i.

⁸Pijo adŭp ngan so dayung adi mun anŭ! Dŭhnyah nyindŭk tiban-i!

⁹Kambŭi angān dŭh pijo adŭp ngan, daya bŭkŭn re dapŭd stabi adi angān ko dapu, ka angān re kabŭs mara darŭm tangan daya adi dŭh biyŭn atin masi.

¹⁰Sawŭ, daya saruh re tambit sopŭrŭg pinyikaya ngan, ka kayuh adi angān ko bandar nyiraja yŭn dapŭd re dog dapu daya bŭkŭn.

¹¹Di sikasŭn udip ngan, angān re guring nyidaing di ambok kan ndi pŭrŭng ganan ngan dog man andam,

¹²ka angān re nang, “Mani aku dŭh birajar? Mani aku abah bada daya nyarah ngajar adŭp ku?

¹³Aku abah dingah ajar bara gurū ku. Aku dŭh mbit bat di pinyitayan ngara.

¹⁴Ka gŭgŭh meh aku rada adŭp ku dog[3] pimangŭh di sirung jawin daya bagŭ.”

¹⁵Tŭtŭd ngga sawŭn adŭp mu ka nggen di ayŭh adŭ pinyiawang mu.

¹⁶Dŭh inŭh kana kuu dapŭd anak so dayung bŭkŭn.

¹⁷Anak mu patut jadi bās baga yŭn turung kuu, dŭh yŭn daya bŭkŭn.

¹⁸Ngapŭi udip sanang meh ngga sawŭn mu ka pimunos adŭp mu ngga ayŭh adi kuu sawŭn,

¹⁹adi ramus mun dayung pimaguh. Bada pinyiramus-i nyanang atin mu; bada ayŭh kirurung pimudip mu ngga pinyiawang-i.

²⁰Re ngga mani kuu awang dayung bŭkŭn, nak? Re ngga mani kuu raan dŭ di pinyiramus sawŭn daya?

²¹TUHAN kiris sopŭrŭg kayuh ndai mu. Kamaki maki kuu panu, Ayŭh nyibatŭh kuu.

²²Dosa daya ginaka inŭh jarat. Ngara rakat di jarat dosa adŭp ngara.

²³Ngara kabŭs sabab dŭh kingat jaga aran pimudip ngara. Pimudip ngara adi raru budo taban ngara ka kubur.