Read Biatah Bidayuh PITAS 7 Bible Online

PITAS 7 - Biatah Bidayuh bible

PITAS 7

¹Ingat kayuh adi aku nang, nak, dŭhnyah kambŭt kayuh adi aku bada kuu ndai.

²Tunda pinganang ku, ka kuu re udip. Nakit tunda ajar ku mun kuu nakit kingat batŭh mu.

³Bidigen di ajar ku barang andu ka nyikŭn-i darŭm atin mu.

⁴Bada pinyibijak keya ka sude dayung mu, ka pinyipitar keya ka jerā rapat mu.

⁵Pinyibijak ngga pinyipitar re pijo kuu so sawŭn daya, so dayung ngga pinganang nyikuro-i.

⁶Agi ndi sidah aku nyingo so pinjan ramin ku,

⁷ka kiris bagŭ dari mara adi bayuh sukup mirati kayuh, pak agi ndi naan adi manŭn budo.

⁸Ayŭh panu di aran passar sindŭk ndi sikuh tarun di yŭn ndi naan dayung rŭŭ. Ayŭh panu murah sindŭk ramin-i

⁹singumi andu kan-i mbŭh piguru re karŭm.

¹⁰Komŭnŭ dayung anŭ bidapŭd ngga ayŭh; ayŭh nēn piraka-i mun dayung sundar ka mbŭh aŭn bipikir pasar kayuh re-i ndai.

¹¹Ayŭh dayung adi pagan ka dŭh puan mangŭh adi ari agi panu di aran

¹²puan kah mijog kajŭn di sikuh tarun; mbŭh-i di aran, mbŭh-i di passar.

¹³Ayŭh rasu dakŭp dari mara anŭ, sium ayŭh, nŭtŭn tingga ayŭh di batŭh-i, ka nang,

¹⁴“Aku muko jugan sadis andu ati ka mbŭh biyŭn dagin so sadis anŭ.

¹⁵Ngapŭi aku ruah di jiroh kuu, ka madin aku mbŭh dapŭd kuu!

¹⁶Aku mbŭh napas ambok ku ngga banang linen so Egypt.

¹⁷Aku mbŭh bada-i buuh ramak ngga inyo myrrh, gaharu, ka kurit kayuh adi buuh ramak.

¹⁸Ja ata nyibŭŭs ndi ngarŭm ngarŭm. Ata re gaŭn bitapang ngga dingan ta.

¹⁹Banŭh ku mating digiti. Ayŭh mbŭh matak ka tarun adi jo.

²⁰Ayŭh taban bagŭ duit ka dŭh re pari sitŭkŭd duwŭh minggu.”

²¹Ka dayung anŭ piripong ayŭh ngga piminyu pinganang-i adi raru sidi ndŭg ka ayŭh mbŭh nurut adŭ.

²²Ayŭh rasu tunda dayung anŭ, mun dari sapi re dog simareh, mun peyu mirupat ka darŭm jarat;[5]

²³di yŭn reja-panah tabŭk atin-i. Ayŭh mbŭh keya ka manuk mŭrŭt jarat, dŭh puan pingandai-i anŭ re tambit asŭng-i.

²⁴Ngapŭi meh, bara anak ku, dingah aku. Nakit dingah kayuh adi aku nang.

²⁵Dŭhnyah bada dayung adi mun anŭ tarik atin ngan; dŭhnyah jiroh ayŭh.

²⁶Ayŭh adi mbŭh bada dari bagŭ rusak ka mbŭh bada bagŭ kabŭs ndŭg ka dŭh dapŭd dog mirang.

²⁷Kambŭi kuu di ka ramin-i, kuu mbŭh di aran ka ong daya adi mbŭh kabŭs. Anŭ inŭh aran purok nuju pinyikabŭs.