Read Biatah Bidayuh PITAS 8 Bible Online

PITAS 8 - Biatah Bidayuh bible

PITAS 8

¹ Dingah! Pinyibijak bagan. Pinyimirati bada adŭp-i dog dingah.

²Di tibung sandah sindŭk aran ka di sakap aran ayŭh mijog.

³Di aran mŭrŭt kupo, sindŭk tiban-bās, ayŭh bagan:

⁴“Aku mite sopŭrŭg ngan; aku bagan barang naan daya di ong.

⁵Angān adi babŭ bipikir mun anak daya? Birajar meh bipikir mun daya adi mirati kayuh. Angān budo kah? Birajar meh pinyipitar.

⁶Dingah pinganang ku; amai sopŭrŭg adi aku kidaan di angān inŭh batur.

⁷Kayuh adi aku nang inŭh sawŭ; pinganang kadong inŭh kayuh adi aku tiru.

⁸Barang masam kayuh adi aku nang inŭh sawŭ; mating adi sarah puan kah adi bisa kinanyap daya.

⁹Di ngara adi biyŭn pinyipitar, sopŭrŭg-i tarang; di ngara adi biyŭn pinyipuan, sopŭrŭg-i granan.

¹⁰Gruwŭn ajar ku rabis so pirak; gruwŭn pinyipuan rabis so mas adi siabo brega.

¹¹“Aku ati Pinyibijak, aku kana dŭ so batuh brega; mating kayuh adi angān raan dapŭd dog danding ngga aku.

¹²Aku ati Pinyibijak, ka aku biyŭn pinyipitar; aku biyŭn pinyipuan ka atin mirati.

¹³Stabi di TUHAN inŭh tiru di kayuh arap; Aku tiru di udip sambuh ka udip gambung, udip adi arap ka pinganang tipu.

¹⁴Aku nggen pinyitayan adi kana ka pinimbang adi bijak. Aku biyŭn pinyipuan ka aku ati bake.

¹⁵Aku turung raja mritah ka turung pimritah ndai ukum-adat adi kana.

¹⁶Sopŭrŭg pimritah di ong mritah ngga pinurung ku, simŭnŭ gŭh bara pinurung ka daya adi bās.

¹⁷Aku rindu ngara adi rindu aku; asi adi jiroh aku re dapŭd aku.

¹⁸Aku dapŭd nggen pinyikaya ngga stabi, udip kaya ngga udip mujur.

¹⁹Kayuh adi angān dapŭd so aku inŭh kana dŭ so mas adi siabo brega, kana dŭ so tigŭrŭ mas.

²⁰Aku panu kadŭg aran pinŭnggŭn; aku tunda aran pinyitŭnggŭn,

²¹nggen pinyikaya di ngara adi rindu aku, ngisi ramin ngara ngga buat-rata.

²² “TUHAN napa aku diŭ so sopŭrŭg kayuh bŭkŭn, sibungas pingandai-I, ndun jah.

²³Aku inŭh adi sibungas dog napa, diŭ so ong dog napa.

²⁴Aku dog biranak diŭ so rawŭt, di tika mating rubang piin.

²⁵Aku dog biranak diŭ so darŭd, diŭ so sandah dog pijog,

²⁶diŭ so Tapa napa ong ngga tana bait kah sibungas unjut tana.

²⁷Aku agi diginŭ di tika Ayŭh mamad rangit di tika Ayŭh mamad au-tarun di tunduh rawŭt,

²⁸di tika Ayŭh na abun di rangit, di tika Ayŭh kuka rubang piin di rawŭt

²⁹ka nggen ukum bada piin di rawŭt maad pak dŭh rabis so adi muko-I bada. Aku agi diginŭ di tika Ayŭh na pimŭnŭs ong.

³⁰Aku agi ngapid Ayŭh keya ka tuan-tukang,[6] barang andu aku bada asŭng-I pawŭn, aku ari sanang di yŭn pinyirŭŭ-I.

³¹Aku sanang asŭng di ong ka munos asŭng ngga rayat manusia.

³²“Madin, angān adi mara, dingah aku. Tunda pinyitayan ku, ka angān re sanang.

³³Dingah kayuh adi dog ngajar di angān. Bada adŭp ngan bijak; dŭhnyah nyibireu-i.

³⁴Ngara adi dingah aku re sanang -- ngara adi guru di tiban ramin ku barang andu, ngara adi kajŭn di tiban ramin ku.

³⁵Ngara adi dapŭd aku dapŭd udip, ka TUHAN re munos asŭng-I di ngara.

³⁶Ngara adi dŭh dapŭd aku kandam adŭp-i; daya adi tiru di aku rindu di pinyikabŭs.”