Read Biatah Bidayuh EKLISIASTIS 1 Bible Online

EKLISIASTIS 1 - Biatah Bidayuh bible

EKLISIASTIS 1

¹Ati inŭh buwa buwa pinganang Philosopha, anak David, adi raja di Jerusalem.

²Dŭh biyŭn rati, dŭh biguna, Philosopha nang. Udip dŭh biguna, sopŭrŭg-i dŭh biyŭn rati.

³Sitŭkŭd umbur mu kuu bandar nyiraja, ka ani utung-i, ani kana-i di kuu?

⁴Mandŭg turap ndi ka bu turap andi, pak ong ati babŭ mun mun-i.

⁵Batŭh andu nusak ka batŭh andu simŭdŭp, pari ka puun-i di so-i pari pari simŭnŭ.

⁶Sabak poh ka siratan, sabak poh ka utara, bipusing pusing ka pari mun anŭ.

⁷Barang sungi aman ka rawŭt, pak rawŭt bayuh puno. Piin pari ka atak sungi, ka piguru aman dinge.

⁸Sopŭrŭg kayuh mating pinŭbŭn-i, dŭh tungang dog kira. Batŭh dŭh puas tingga, kajit dŭh puas dingah.

⁹Kayuh adi muko jadi re jadi dinge. Kayuh adi muko dog ndai re dog ndai dinge. Mating kayuh adi bauh di ndi ong ong.

¹⁰“Tingga,” ngara nang, “ati kayuh bauh!” Pak-i kayuh adi mbŭh jadi diŭ so ata dog biranak.

¹¹Mating daya ingat kayuh adi mbŭh jadi ndun jah; ka di jaman adi re, mating daya ingat kayuh adi jadi di asah jaman ati ngga jaman anŭ.

¹²Aku, adi Philosopha, muko jadi raja Israel di Jerusalem.

¹³Aku mbŭh natu aku re piruh ka pirasa sopŭrŭg kayuh adi dog ndai di ong ati. Pimudip adi Tapa mbŭh nggen di ata manusia mbŭh ruai arap-i.

¹⁴Aku mbŭh kiris bagŭ pingandai daya di ong, ka aku nang, sopŭrŭg-i dŭh biguna. Anŭ mbŭh keya ka tadak sabak.

¹⁵Kuu dŭh dapŭd nŭnggŭn kayuh adi mbŭh bidikok; kuu dŭh dapŭd mirang kayuh adi mating.

¹⁶ Aku nang darŭm asŭng ku, “Aku mbŭh jadi daya bās, rabis bijak so tadŭ tadŭ daya adi mbŭh mritah Jerusalem diŭ so aku. Aku puan ani sibandar-i pinyibijak ngga pinyipuan.”

¹⁷Aku mbŭh ruai an puan ani anŭ pinyipuan ka ani anŭ udip budo, ani anŭ pinyibijak ka ani anŭ udip sipadin. Pak kinyam ku, mbŭh kana dŭ aku tadak sabak.

¹⁸Makin kuu bijak, makin bagŭ kayuh bada kuu susah; makin kuu puan bagŭ kayuh, makin-i kandam kuu.