Read Biatah Bidayuh EKLISIASTIS 10 Bible Online

EKLISIASTIS 10 - Biatah Bidayuh bible

EKLISIASTIS 10

¹Tadang tura bisa pirusak ndi sirapak inyo wangi, ka simŭnŭ gŭh pinyibudo adi sŭ bisa kinanyap pinyibijak adi bās.

²Taŭn mbŭh tibiat daya bijak ndai kayuh adi batur ka daya budo ndai kayuh adi sarah.

³Pinyibudo ngara taŭn tatŭng, ndŭg ka di batŭh daya saruh adi ngara ngga bidapŭd di aran; ngara kiren adŭp-i budo di barang naan daya.

⁴Kambŭi pimritah ngan baji di angān, dŭhnyah rasu kidaan di ayŭh nang adŭp ngan raan bu; sarah adi raru bat dapŭd dog apun kambŭi angān pirŭŭ adŭp ngan.[11]

⁵Simuti dinge pinyitŭnggŭn adi dŭh dog pimanu di ong, anŭ inŭh pingandai sarah pimritah.

⁶Daya budo dog nggen kuasa darŭm daya kaya dog nyibireu.

⁷Aku mbŭh kiris urun guru di tunduh kuda darŭm daya adi bās panu kaja mun urun.

⁸ Kambŭi angān kareh rubang, angān rabu ka darŭm-i; kambŭi angān nyirubuh sindung, jippŭh kuut angān.

⁹Kambŭi angān nyiraja di kwari batuh, angān mandam bada batuh. Kambŭi angān mutah apŭg kayuh, angān mandam bada-i.

¹⁰Kambŭi kapak ngan tajŭ ka angān dŭh ngasa-i, angān an bandar nyiraja pakai-i. Kana dŭ nakit bisatur diŭ so ndai kayuh.

¹¹Pandai main jippŭh dŭh biguna kambŭi angān tandah jippŭh kuut diŭ.

¹²Kayuh adi daya bijak nang taban stabi ka adŭp ngara, pak daya budo rusak bada pinganang adŭp ngara.

¹³Ngara piguru minyu ngga pinganang adi dŭh tatu ka pinŭbŭn-i ngara minyu mun daya gira.

¹⁴Daya budo dŭh pandai ko minyu. Mating daya puan ani re jadi, ka mating daya dapŭd kidaan di ata ani re jadi ripas ata kabŭs.

¹⁵Daya adi nyiraja ndŭg ka mbŭh re kirarah inŭh keya ka daya budo adi dŭh puan aran-i mari ka arŭn adŭp-i.

¹⁶Rais inŭh darŭm susah kambŭi raja-i gibabŭ mara ka bara pinguru-i bigawai ndi ngarŭm ngarŭm.

¹⁷Pak rais adi binasip kana inŭh adi biyŭn raja adi ndai pikir-kira adŭp-i ka bara pinguru adi man di tika adi batur, adi nakit jaga adŭp-i ka dŭh mabuk.

¹⁸Kan daya paŭh tibanga nyurat tibung ramin-i, ramin-i re siret, ka tibung ramin anŭ re rukob.

¹⁹Gawai bada angān pawŭn ka wain bada angān gaŭn, pak angān dŭh dapŭd biyŭn-i kambŭi dŭh biyŭn duit.

²⁰Dŭhnyah ngamun raja, bait darŭm atin ngan, ka dŭhnyah ngamun daya kaya, bait darŭm birit bŭŭs ngan. Amai manuk bisa gŭh pait pinganang ka kidaan kayuh adi angān mbŭh nang.