Read Biatah Bidayuh EKLISIASTIS 12 Bible Online

EKLISIASTIS 12 - Biatah Bidayuh bible

EKLISIASTIS 12

¹Ngapŭi ingat meh Pinapa mu[12] darŭm kuu gibabŭ mara, ka diŭ so tipuh sangsara anŭ mandŭg kan kuu nang, “Aku mating kinyam pimudip ku pawŭn.”

²Anŭ inŭh tika jawa batŭh andu, buran, ka bitang, kabur di piningga mu, ka kruman re adu adu nyayung kuu.

³Komŭnŭ tangan mu, adi grindung kuu, re kimŭtŭr; ka kaja mu, adi bake madin, re ramah. Jipŭh mu re kurang ngga ngunyai pinguman mu, ka batŭh mu raru kabur re ngga kiris tarun.

⁴Kuu re bangam ndŭg ka dŭh dapŭd dingah dudu di aran raya. Kuu re dŭh dapŭd dingah jawŭn daya ngisar puan kah jawŭn musik. Kuu re dŭh tia bŭŭs rŭrŭ; ka sirŭŭn manuk biragu re bada kuu dŭh dapŭd bŭŭs.

⁵Kuu re taru tarun yŭn adi bigatung, ka kuu re panu ngga nakit. Ubok mu re buda; kuu re nyana panu, ka pinyiraan mu re mating. Ata re di ka tarun yŭn rŭŭ ta adi sikasŭn, ka nganŭ re agi sien di aran raya.

⁶Parik pirak re patŭd, ka prita mas re rabu ka pape; taris ngga tarik piin di prigi re patŭd, ka tipayan piin re papar.

⁷Pŭrŭng ta re pari jadi dabu tana, ka asŭng udip ta re pari ka Tapa adi nggen-i di ata.

⁸Sopŭrŭg anŭ dŭh biyŭn rati, nang Philosopha. Manŭn dŭh biyŭn rati.

⁹Pak sabab Philosopha bijak, ayŭh ari ngajar daya kayuh adi-i puan. Ayŭh birajar pitas ka muko nakit pirasa munki-i sawŭ.

¹⁰Philosopha suba jiroh pinganang saduh, ka buwa pinganang adi-i nuris inŭh batur buang tŭnggŭn.

¹¹Pinganang daya bijak inŭh keya ka sikud adi reja adi pingingat-biri pakai ngga nguru biri, ka pitas adi dog nguruk inŭh tan keya ka pasak dog masak tŭrŭp ka tagap. Sopŭrŭg anŭ dog nggen Tapa, adi Pingingat-biri sopŭrŭg ta.

¹²Nak, agi dinge kayuh adi kuu patut puan. Surat dŭh bisa abo dog nuris, ka paŭh bandar birajar re pirarah kuu.

¹³Pungus-i, ndi adŭ kayuh an nŭŭh nang: stabi di Tapa, ka tunda pinyipesan-I, amai yŭn anŭ inŭh manusia dog napa.

¹⁴Tapa re tingga arap kana sopŭrŭg pingandai ta, ndŭg ka anŭ adi ata ndai darŭm bisukan ani.