Read Biatah Bidayuh EKLISIASTIS 3 Bible Online

EKLISIASTIS 3 - Biatah Bidayuh bible

EKLISIASTIS 3

¹Barang masam kayuh adi jadi di ong jadi di tika adi Tapa mbŭh mien.

²Ayŭh natu tika adi ngga daya biranak ngga tika adi ngga daya kabŭs, tika yŭn nyipurun ka tika yŭn dimbut,

³tika yŭn siŭ ngga tika yŭn pibua, tika yŭn nyirubuh ngga tika yŭn piramin.

⁴Ayŭh natu tika yŭn susah ka tika yŭn gaŭn, tika yŭn muās ka tika yŭn bitanda,

⁵tika yŭn bidakŭp ka tika yŭn dŭh bidakŭp, tika yŭn bisium ka tika yŭn dŭh bisium.

⁶Ayŭh natu tika yŭn dapŭd ka tika yŭn kinanyap, tika yŭn nyikŭn ka tika yŭn taran,

⁷tika yŭn nyiratak ka tika yŭn napung, tika yŭn pajam ka tika yŭn minyu.

⁸Ayŭh natu tika yŭn rindu ka tika yŭn tiru, tika yŭn biperang ka tika yŭn bidamai.

⁹Ani kah dapŭd ta so kraja ta?

¹⁰Aku puan pinyirabis adi bat adi Tapa mbŭh nggen di ata.

¹¹Ayŭh mbŭh natu tika adi batur yŭn sopŭrŭg kayuh. Ayŭh mbŭh nggen di ata pinyiraan yŭn puan tipuh adi re, pak bŭn nggen di ata pinyipuas mirati kayuh adi ndai-I.

¹²Jadi meh sŭn aku nang, kaŭs ata bada asŭng ta sanang adŭ ka pirami adŭp ta darŭm ata gibabŭ udip.

¹³Sopŭrŭg ata patut man nok ka pimunos adŭp ta ngga kayuh adi ata mbŭh dapŭd so turang udas adŭp ta. Anŭ, pinganggen so Tapa.

¹⁴Aku puan kayuh adi Tapa ndai re tan adu adu. Nŭŭh dŭh dapŭd nambah puan kah tambit ani ani so dieh. Tapa ndai simŭnŭ ngga bada ata stabi di adŭp-I.

¹⁵Kayuh adi jadi puan kah kayuh adi bisa jadi mbŭh jadi ndun jah. Tapa bada kayuh anŭ pari pari jadi.

¹⁶Ngga nambah anŭ, aku gŭh mbŭh ngatin udip ginaka agi di ong ati, di yŭn pinyitŭnggŭn ngga pinŭnggŭn patut agi.

¹⁷Aku nang darŭm asŭng ku, “Tapa re nggen bisara di daya adi kana ngga daya adi arap, sabab sopŭrŭg kayuh, sopŭrŭg urah, re jadi di tika adi mbŭh dog natu.”[1]

¹⁸Sakati meh aku: Tapa suba ata, an bada ata puan ata dŭh kurang so dāng.

¹⁹Amai sawŭ, nasip manusia ngga nasip dāng agi samah. Kabŭs ndi, mun anŭ ndi gŭh. Manusia dŭh re kana dŭ so dāng, sabab pimudip dŭh biyŭn rati yŭn soduwŭh-i.

²⁰Soduwŭh-i re di ka tarun yŭn adi samah -- ka tana. Soduwŭh ngara mandŭg so tana; soduwŭh ngara re pari kamanŭ.

²¹Simuki daya re puan nang roh manusia re maad ka sambu ka roh dāng re mūn ka darŭm tana?

²²Jadi aku rada meh kayuh adi siabo kana adi bisa ata ndai inŭh pimunos adŭp ta ngga kayuh adi ata dapŭd so turang udas ta. Mating kayuh bŭkŭn bisa ata ndai.[2] Mating aran ata re puan ani re jadi ripas ata mbŭh kabŭs.