Read Biatah Bidayuh EKLISIASTIS 4 Bible Online

EKLISIASTIS 4 - Biatah Bidayuh bible

EKLISIASTIS 4

¹Komŭnŭ aku tingga dinge ka kiris sopŭrŭg daya dog kinanyuh di barang yŭn di ong. Daya adi dog kinanyuh sien, ka mating daya turung ngara. Mating daya an turung ngara, sabab bara adi kinanyuh ngara inŭh daya adi bikuasa.

²Aku ripong di ngara adi mbŭh kabŭs adi mbŭh mating; ngara sanang dŭ so ngara adi babŭ udip.

³Pak adi sanang dŭ so tadŭ tadŭ ngara inŭh ngara adi bŭn dog biranak, adi bŭn kiris kayuh adi sipŭ adi jadi di ong.

⁴Aku gŭh mbŭh puan ani sabab daya bandar nyiraja yŭn dapŭd mujur: ngara sina di rasū ngara. Pak anŭ mating rati-i. Mbŭh keya ka tadak sabak.

⁵Ngara nang, daya adi budo inŭh adi bidakŭp ngga tangan-i ka tandah adŭp-i kabŭs sikirau.

⁶Kadŭ sawŭ, pak kana dŭ biyŭn nisŭ, ngga pikir adi tanang, so nŭŭh bandar nyiraja ngga soduwŭh tangan, suba nakap sabak.

⁷Aku mbŭh kiris kayuh bŭkŭn adi dŭh biyŭn rati darŭm pimudip ati.

⁸Agi ndi naan daya adi udip sadi. Ayŭh dŭh biyŭn anak, dŭh biyŭn jurud, pak ayŭh marar nyiraja, dŭh puas ngga pinyikaya adi ayŭh mbŭh biyŭn. Yŭn asi ayŭh bandar nyiraja ka bitan adŭp-i so pinyirami? Anŭ gŭh dŭh biyŭn rati, buang pimudip adi sangsara.

⁹Duwŭh naan inŭh kana dŭ so ndi naan, sabab samah nyiraja ngara duwŭh dapŭd turung dingan-i.

¹⁰Kambŭi ndi naan so ngara rabu, sianŭ ndi dapŭd turung pakat ayŭh. Pak kambŭi daya anŭ sadi adŭp-i ka rabu, anŭ mbŭh payah inŭh, sabab mating daya re turung ayŭh.

¹¹Kambŭi di tika madud, duwŭh naan dapŭd bŭŭs samah ka kinyam paras, pak simuki kuu re dapŭd paras kambŭi kuu sadi?

¹²Duwŭh naan daya dapŭd rawan serang adi dapŭd ngarah ndi naan daya. Ndi taris baga dog ndai so taruh sirah taris anŭk dŭh dapŭd dog matŭd.

¹³Daya bisa ruah so udip sirata ka jadi raja di rais-i, puan kah ruah so ramin jer di guru di takta, pak kambŭi darŭm ayŭh mbŭh minyamba ka raru budo abah dingah pinyitayan, ayŭh dŭh re nama daya adi mara adi sirata pak pitar.

¹⁵Aku bipikir pasar sopŭrŭg daya adi udip di ong, ka rada di dupan ngara agi ndi naan daya mara adi re gati raja.

¹⁶Kiang rayat adi raja mritah kadŭ dŭh dapŭd dog mirang; kan ayŭh mbŭh kabŭs, mating daya re ingat pingandai kana-i. Mating rati-i. Anŭ mbŭh keya ka tadak sabak.