Read Biatah Bidayuh EKLISIASTIS 9 Bible Online

EKLISIASTIS 9 - Biatah Bidayuh bible

EKLISIASTIS 9

¹Aku bipikir pasar sopŭrŭg kayuh anŭ ngga sitŭrŭp-i ka puan nang Tapa nguasa pingandai daya bijak ngga daya tŭnggŭn, ndŭg ka atin rindu ngga atin tiru ngara. Mating daya puan tadŭ tadŭ kayuh adi re jadi.

²Mating bŭkŭn-i.[8] Ndi nasip anŭ mandŭg ka daya tŭnggŭn ngga daya ginaka, ka daya kana ngga daya arap,[9] ka ngara adi tŭtŭd di adat ngga ngara adi dŭh, ka ngara adi jugan sadis ngga ngara adi dŭh. Daya adi kana dŭh rabis bituah so daya adi bidosa; daya adi bipayu dŭh rabis bituah so daya adi abah bipayu.

³Sopŭrŭg nasip manusia samah, ka anŭ inŭh sarah mun sopŭrŭg kayuh adi bŭkŭn adi jadi di ong ati. Sitŭkŭd manusia udip, pikir-kira ngara puno ngga andam ka sangsara, ka gŭgŭh ngara kabŭs.

⁴Pak daya adi udip di ong daya adi udip biyŭn pingarap. Kasong adi udip kana dŭ so singah adi mbŭh kabŭs.

⁵Sawŭ, adi udip puan adŭp ngara re kabŭs, pak daya adi kabŭs dŭh puan ani ani. Ngara dŭh tia biyŭn upah; ngara mbŭh dog kambŭt.

⁶Atin rindu ngara, atin tiru ngara, pinyiraan ngara, sopŭrŭg-i kabŭs ngga ngara. Ngara dŭh tia sua ndai ani ani adi jadi di ong.

⁷Man adŭ pinguman ngan ka gaŭn; nok wain ngan ka pirami adŭp ngan. Dŭh Tapa nagah.

⁸Bada adŭp ngan pawŭn ka gaŭn.

⁹Bada pawŭn pimudip ngan ngga sawŭn ngan adi angān rindu, sitŭkŭd angān udip ngga pimudip adi dŭh biyŭn rati adi Tapa mbŭh nggen di angān di ong ati. Nyipawŭn adŭp ngan ngga barang andu, sabab kaŭs anŭ adŭ angān dapŭd so susah payah ngan.

¹⁰Ndai sopŭrŭg kraja ngan ngga siabo tungang ngan, sabab di ong daya adi mbŭh kabŭs re mating kraja, mating pikir-kira, mating pinyipuan, mating pinyibijak; kamanŭ angān re di.

¹¹Agi dinge adi aku rada: daya adi tukang bikaduh dŭh re ari manang, ka daya adi pagan dŭh re ari manang darŭm biperang. Daya adi bijak dŭh re ari dapŭd pinguman, daya adi pitar dŭh re ari dapŭd kaya, ka daya adi pandai dŭh re ari dapŭd paad pangkat. Nasip arap jadi di barang naan daya.

¹²Angān dŭh puan sinde tung jangān tika mandŭg. Mun manuk adi tipia dog jarat, mun iken adi tipia dog jaring, ata dog nyatŭk kayuh adi arap di tika adi dŭh ata rada.

¹³Agi adi bŭkŭn adi aku kiris, suto adi kana pasar ani pinyibijak sŭn daya di ong ati nang.

¹⁴Agi ndi anak kupo di yŭn daya dŭh bagŭ rŭŭ. Ndi naan raja adi bake nyerang-i. Ayŭh nyikapung-i ka sidia re nyirubuh sindung kupo anŭ.

¹⁵Agi ndi naan daya adi sirata rŭŭ di kupo anŭ, adi pitar ka dapŭd nyiramat kupo anŭ. Pak mating daya rada ayŭh.[10]

¹⁶Aku mbŭh ari nang pinyibijak kana dŭ so pinyibake, pak mating daya nyirundeng daya sirata bijak bait piduri kayuh adi ngara nang.

¹⁷Kana dŭ dingah pinganang duduh daya bijak so nŭŭh dingah sirais ndi naan pimritah di udung bara sibudo.

¹⁸Pinyibijak kana dŭ so sinyata, pak ndi naan daya bidosa bisa pirusak raru bagŭ kayuh kana.