Read Biatah Bidayuh RAGU 3 Bible Online

RAGU 3 - Biatah Bidayuh bible

RAGU 3

¹Barang ngarŭm aku bŭŭs, di tunduh pangō ku, aku pŭmŭh ayŭh adi aku awang; Aku jiroh ayŭh, pak dŭh tungang dapŭd.

²Aku panu maning kupo, kadŭg aran ngga anak anak aran-i. Aku jiroh ayŭh adi aku awang. Aku jiroh, pak dŭh tungang dapŭd ayŭh.

³Ngara adi tukang jaga darŭm-i panu di kupo kiris aku. Aku siken ngara, “Agi angān kiris ayŭh adi aku awang?”

⁴Kan aku bu so yŭn ngara, aku dapŭd ayŭh. Aku dakŭp ayŭh ka abah aku pasan ayŭh ndŭg ka aku mbŭh taban ayŭh ka ramin sindŭ ku, di ka birit adi yŭn aku dog biranak.

⁵Bijanji ngga aku dayung dayung Jerusalem; bipayu pakai peyu ngga jerak angān dŭh re nyirirog pinyiawang ami.

⁶Ani anŭ adi mandŭg so tarun tana-pajam mun jambung asuh, buuh kimanyan ngga myrrh, kimanyan adi dog jua daya dagang?

⁷Solomon mandŭg, dog taban guru di takta-i; nŭm puru naan soldadu jadi pingibān, bara soldadu di Israel adi siabo pandai birawan.

⁸Sopŭrŭg ngara pandai birawan pakai pedang; ngara mbŭh jadi bake buang sukup pandai so ari biperang. Barang naan ngara biyŭn pedang, bijaga ka sidia yŭn serang singarŭm.

⁹Raja Solomon dog taban guru di takta adi dog ndai so kayuh adi siabo kana.

¹⁰Tiang-i dog marut ngga pirak; di tunduh-i agi banang dog ngabuh ngga mas. batar yŭn guru dog marut ngga banang bēng, nakit dog nanun bara dayung Jerusalem.

¹¹Bara dayung Zion, mandŭg ka tingga Raja Solomon. Ayŭh nēn makota adi ko sindŭ-i na di tunduh ubak-i di andu pinyisawan-i, di andu ayŭh gaŭn buang pawŭn.