Read Biatah Bidayuh RAGU 4 Bible Online

RAGU 4 - Biatah Bidayuh bible

RAGU 4

¹Mbŭh raru ramus-i kuu, dayung adi aku awang! Batŭh mu nyirinyak ngga pinyiawang so darŭm banang tutu jawin mu. Ubok mu mun girumbang kaban kambing bikaduh mūn sandah Gilead.

²Jipŭh mu buda mun biri adi bauh ko dog gumbak buruh-i ka dog mamuh. Ndi mating gŭh manyap; ngara mbŭh brimun ramus-i.

³Bibis mu mara bireh; raru ramus kan kuu minyu. Paŭp mu nyirinyak so darŭm banang tutu jawin mu.

⁴Tungo mu mun tawā David, bŭrŭng buang jarŭh,[5] biyŭn kukong adi mun siribu pinangin dog kideng dieh.

⁵Sudo mu mun anak anak jerak, mun anak apid peyu man di karu bunga lili.

⁶Aku re rŭŭ di tibung sandah myrrh, sandah kimanyan, ndŭg ka sabak isan isan poh ka karŭm miyap.

⁷Mbŭh raru ramus-i kuu, kuu adi aku awang; mbŭh sukup ramus inŭh kuu!

⁸Tunda aku so Darŭd Lebanon, kuu adi pingaten dayung ku; mūn ayō aku so Lebanon. Mandŭg ka aku so tibung Darŭd Amana, so Darŭd Senir ngga Darŭd Hermon, di yŭn singah ngga rimaung rŭŭ.

⁹Batŭh mu, pingaten dayung ku adi aku siŭt, ka kukong adi kuu pakai mbŭh tarik atin ku.

¹⁰Pinyiawang mu bada atin ku gaŭn, kuu pingaten dayung ku adi aku siŭt. Pinyiawang mu kana dŭ so wain; wangi mu buuh ramak dŭ so tadŭ tadŭ rapah.

¹¹Bibis mu nyam ju banyis, dayung ku; jura mu inŭh sisuh ngga ju banyis di aku. Piraka mu buuh ramak ngga dagŭn sedar Lebanon.

¹²Kuu adi aku siŭt, pingaten dayung ku, inŭh teya bunga adi dog sukan, teya bunga adi dog nyindung, rubang piin adi sadi nŭŭh dapu;

¹³diginŭ tŭngŭn anak kayuh bagŭ timbu ngara timbu mun risŭn delima ka buān buwa adi rabis sidi. Diginŭ bŭn re mating bunga henna ngga tŭngŭn kayuh adi buuh ramak,

¹⁴bŭn re mating kunyit, tabuh, kurit kayuh adi buuh ramak, puan kah kimanyan adi barang ka mun-i. Myrrh ngga tŭngŭn gaharu agi timbu diginŭ ngga sopŭrŭg wangi adi ruai buuh ramak.

¹⁵Sumbur piin misa teya anŭ, piin adi aman anak sungi, anak piin aman so Darŭd Lebanon.

¹⁶Makat meh, Sabak Utara. Sabak Siratan, poh teya ku; bada sabak buuh ramak. Bada dari adi aku awang mandŭg ka teya-i ka man buwa buwa-i adi siabo sidi.