Read Biatah Bidayuh RAGU 8 Bible Online

RAGU 8 - Biatah Bidayuh bible

RAGU 8

¹Munki kambŭi-i kuu jurud ku, ka sindŭ ku nyisuh kuu di sudo-i. Ka kambŭi aku dapŭd kuu di aran passar, aku bisa sium kuu ka mating daya re ngamun aku.

²Aku dapŭd taban kuu ka ramin sindŭ ku, di yŭn mu dapŭd ngajar aku pinyiawang. Aku bisa nggen di kuu wain gaur rapah, ka ju buwa delima.

³Tangan bait mu inŭh di ribo ubak ku, ka tangan tauh mu puras aku.

⁴Bijanji ngga aku, bara dayung Jerusalem, angān dŭh re nyirirog pinyiawang ami.

⁵Asi ati adi mandŭg so tarun tana-pajam, bikapar ngga dingan-i adi-i awang? Di ribo tŭngŭn epal aku kies kuu, di tarun yŭn kuu dog biranak.

⁶Nyikŭn aku sadi darŭm atin mu; dŭhnyah dakŭp dayung bŭkŭn adŭ-i aku. Pinyiawang inŭh bikuasa mun pinyikabŭs; pinyiripong pŭrŭng inŭh bake mun adŭp pinyikabŭs. Ayŭh bisa rutop jadi apui ka badang kayuh mun apui adi bijagu.

⁷Piin dŭh dapŭd mura-i; mating uba dapŭd ngapuh-i. Pak kambŭi daya suba an miris pinyiawang ngga pinyikaya, mangŭh inŭh re ngara dapŭd.

⁸Kieh biyŭn sude dayung, ka sudo-i babŭ siit. Ani bisa ami ndai kan dari adi mara muah ka yŭn-i?

⁹Kambŭi ayŭh sindung, kieh re pijog tawā pirak di tunduh-i. Pak kambŭi ayŭh tiban, kieh re grindung ayŭh ngga sindung sedar.

¹⁰Aku ati sindung, ka sudo ku inŭh tawā-i. Dari adi aku awang puan ngga ayŭh aku tungang dapŭd udip sanang ka bamai.

¹¹Solomon biyŭn teya anggor di tarun yŭn adi dog kadŭn Baal Hamon. Teya anŭ dog nyewa ka bara tukang teya; barang naan bayar siribu kiping duit pirak yŭn buwa-i.

¹²Solomon kambat jangi siribu kiping duit pirak ka utung bara tukang teya inŭh duwŭh ratus; aku biyŭn tung adŭp ku teya anggor!

¹³Bada aku dingah sirŭŭn mu so teya, dayung adi aku awang; bara dingan ku mbŭh kajŭn an dingah kuu minyu.

¹⁴Mandŭg ka aku, dari adi aku awang, keya ka jerak, keya ka anak peyu di darŭd di yŭn rapah timbu.