Read Biatah Bidayuh ISAIAH 1 Bible Online

ISAIAH 1 - Biatah Bidayuh bible

ISAIAH 1

¹ Surat ati brisi ngga pinganang pasar Judah ngga Jerusalem adi Tapa pinandŭng di Isaiah anak Amoz di jaman Uzziah, Jotham, Ahaz, ngga Hezekiah jadi raja di Judah.

²TUHAN nang, “Ong ngga rangit, dingah kayuh adi Aku nang! Bara anak adi Aku nyiran mbŭh rawan Aku.

³Sapi puan asi dapu ngara, ka kaldi puan diki tuan ngara paan ngara, pak daya Ku Israel dŭh puan. Ngara manŭn dŭh mirati!”

⁴Mbŭh payah inŭh angān, bangsa adi bidosa, angān daya adi mbŭh rusak ka arap! Dosa ngan mbŭh pirabu angān! Angān mbŭh tirawan TUHAN, adi Tapa kudus Israel, ka mbŭh nyipunok Ayŭh.

⁵Mani angān darah birawan? An kah angān trima ukum adi rabis bat-i? Israel, ubak ngan mbŭh puno ngga tawan, ka atin ngga pikir ngan mbŭh mandam.

⁶So ubak ndŭg kaja ngan mating tapo adi pidanah. Angān mbŭh puno bada karag, bakang, ka tawan. Tawan ngan gibayuh dog ngu ka dog marut, puan kah dog nguri ngga inyo.

⁷Rais ngan mbŭh dog pirusak, ka kupo kupo ngan mbŭh dog sigot ndŭg ka rŭpŭg. Di sirung jawin ngan, daya tami sirapas tana ngan ka pirusak ani ani adi agi dieh.

⁸Kaŭs-i Jerusalem adŭ adi dŭm, kupo adi mbŭh dog nyikapung ka mbŭh rapā mun bari daya adi jaga di teya anggor puan kah sidangak di teya timun.

⁹ Kambŭi TUHAN adi Bisa-pŭrŭg dŭh bada kada daya dŭm, Jerusalem mbŭh rabur, mun Sodom ngga Gomorrah.

¹⁰Jerusalem, pimritah mu ngga daya mu inŭh keya ka Sodom ngga Gomorrah. Dingah kayuh adi TUHAN nang di kuu. Nakit dingah kayuh adi Tapa ta ngajar di kuu.

¹¹ Ayŭh nang, “Kuu pikir Aku raan sopŭrŭg sadis anŭ adi kuu pari pari jugan ka Aku? Aku mbŭh abah tia trima biri adi kuu badang ndu sadis, ka simŭnŭ gŭh ngga ramak dāng mu adi siabo gamu. Aku mbŭh reju di deya dari sapi, biri, ka kambing.

¹²Asi bada angān taban ka yŭn Ku sopŭrŭg-i kan angān mandŭg di nyambah Aku? Asi bada angān bidigang darŭm Ramin Ku?

¹³Dŭh biguna inŭh angān taban sadis. Aku tiru di dagŭn kimanyan adi angān badang. Aku dŭh tan kiris Gawai Anak Buran ngan, andu Sabbath ngan, ka tikuruk adat ngan; sopŭrŭg-i mbŭh rusak bada dosa ngan.

¹⁴Aku tiru di Gawai Anak Buran ngan ka andu andu primisi ngan; anŭ mbŭh jadi pinyirabis adi bat di Aku, ka Aku mbŭh reju kabis-i.

¹⁵“Kan angān pakat tangan ngan bidua, Aku re dŭh kimat angān. Dŭh kira pikudu kari angān bidua, Aku re dŭh dingah, amai tangan ngan puno ngga deya.

¹⁶Mamuh adŭp ngan bada bisig. Pirŭŭ sopŭrŭg pingandai arap anŭ adi Aku kiris angān ndai. Sawŭ, dŭh tia ndai arap

¹⁷ka birajar ndai kayuh adi batur. Pimanu kraja pinyitŭnggŭn, turung daya adi dog kinanyuh, nggen di anak tumang hak ngara, ka ngibān dayung uban.”

¹⁸TUHAN nang, “Ja, ngatur har ati. Angān mbŭh bitameg bireh bada dosa, pak Aku re ngu angān bada bisig mun salju.[1] Sunggu kais ngan takod bireh, angān re buda mun buruh biri.[2]

¹⁹Kambŭi angān tunda pinganang Ku, angān re trima buwa tana ngan adi kana.

²⁰Pak kambŭi angān rawan Aku, angān re kabŭs. Aku, adi TUHAN, mbŭh minyu.”

²¹Kupo adi ko dawŭ-i tŭtŭd madin mbŭh keya ka sundar! Dawŭ-i kupo anŭ brisi ngga daya tŭnggŭn, pak madin kaŭs-i bara pinyiŭ adŭ rŭŭ dieh.

²²Jerusalem, kuu ko dawŭ-i mun pirak, pak madin kuu mbŭh dŭh biguna; kuu ko dawŭ-i mun wain adi kana, pak madin kuu mbŭh piin saja.

²³Bara pinguru mu inŭh daya adi an birawan ka jerā bara pinaku; ngara marar trima pinganggen ngga suap. Ngara bŭn ngibān anak tumang di yŭn bisara bait dingah pinganang dayung uban pasar har ngara.

²⁴Jadi madin, dingah kayuh adi TUHAN Bisa-pŭrŭg, Tapa Israel adi bikuasa, nang: “Aku re maras dendam di kuu, pinganyu Ku, ka kuu re dŭh tia nyusah Aku.

²⁵Aku re ngukum kuu. Aku re pibisig kuu mun daya pibisig basi, ka re taran sopŭrŭg pinyikais mu.

²⁶Aku re nggen di kuu pinguasa ngga tukang pitayan mun adi ko kuu biyŭn dawŭ-i. Komŭnŭ Jerusalem re dog kadŭn kupo adi tŭnggŭn buang tŭtŭd.”

²⁷Sabab TUHAN inŭh tŭnggŭn, Ayŭh re nyiramat Jerusalem ngga barang naan daya diginŭ adi mbŭh marik pimudip-i pari ka Tapa.

²⁸Pak Ayŭh re pirarap barang naan daya adi bidosa ngga adi rawan Ayŭh; Ayŭh re siŭ barang naan daya adi tagan Ayŭh.

²⁹Kuu re nyesar kuu ko nyambah tŭngŭn kayuh ka ndai teya pirapu'.[3]

³⁰Kuu re rayu mun tŭngŭn oak adi mbŭh re kabŭs, mun teya adi dŭh dog misa ngga piin.

³¹Mun siriyang sau bada sirah bŭtŭp apui, simŭnŭ gŭh daya bikuasa re rabur bada pingandai arap adŭp ngara, ka mating daya re dapŭd pirŭŭ pinyirusag anŭ.