Read Biatah Bidayuh ISAIAH 10 Bible Online

ISAIAH 10 - Biatah Bidayuh bible

ISAIAH 10

¹Mbŭh payah inŭh angān! Angān ndai ukum-adat adi sarah adi pijera daya Ku.

²Simŭnŭ inŭh angān kinarang daya sirata dapŭd hak ngara ka matŭn ngara dog ngatur ngga pinyitŭnggŭn. Simŭnŭ inŭh angān tambit buat-rata dayung uban ngga anak tumang.

³Ani re angān ndai kan Tapa ngukum angān? Ani re angān ndai kan Ayŭh taban pinyirusag so rais adi jo? Kamaki angān mite turung? Diki angān sukan pinyikaya ngan?

⁴Angān re dog siŭ darŭm perang, puan kah dog batak jadi daya-takap. Pak sunggu mŭnŭ, baji TUHAN dŭh re ko; Ayŭh babŭ pakat tangan-I re ngukum.

⁵ TUHAN nang, “Assyria! Aku pakai Assyria keya ka pukong ngga ngukum ngara adi yŭn Ku baji.

⁶Aku pait Assyria bada nyerang bangsa adi mbŭh taran pinyabah, ka adi mbŭh bada Aku baji. Aku pait ngara bada sirapas ka naku kayuh ngara ka bidigang di tunduh ngara mun digang tana di aran.”

⁷Pak Raja-empaya Assyria mbŭh biyŭn pikir-kira adŭp-i. Ayŭh mbŭh natu adŭp-i an pirabur bagŭ bangsa.

⁸Ayŭh minyu gambung, “Barang naan pingubak soldadu ku inŭh raja!

⁹Aku mbŭh ngarah kupo Calno ngga kupo Carchemish, kupo Hamath ngga kupo Arpad. Aku ngarah Samaria ngga Damascus.

¹⁰Aku pakat tangan ku an ngukum pritah pritah anŭ adi nyambah tibudo, tibudo adi bagŭ dŭ so anŭ di Jerusalem ngga di Samaria.

¹¹Aku mbŭh nyirubuh Samaria samŭn sopŭrŭg tibudo-i, ka aku re ndai simŭnŭ gŭh di Jerusalem ngga di gayŭn gayŭn adi dog nyambah diginŭ.”

¹²Pak TUHAN nang, “Kan Aku muko ngamas kayuh adi Aku ndai di tunduh Sandah Zion ngga di Jerusalem, Aku re ngukum raja-empaya Assyria amai pinganang gambung-i ka uap sambuh-i.”

¹³Darŭm gambung-i raja-empaya Assyria nang, “Aku mbŭh ndai sopŭrŭg-i sadi adŭp ku. Aku bake, bijak ka pandai. Aku taran baat tana rais bangsa bangsa ka sirapas pinyirikŭn-rata ngara. Mun dari sapi aku bidigang di daya adi rŭŭ diginŭ.

¹⁴Bangsa bangsa di ong mun sarin manuk, ka aku sun pinyikaya ngara raru sanang mun sun dudu turoh. Ndi mating gŭh urad mikabap pirawan aku; mating tukuk mikiap nyara aku!”

¹⁵Pak TUHAN nang, “Bisa kah kapak nang adŭp-i bās dŭ so daya adi pakai-i? Agi kah grigaji biguna dŭ so daya adi pakai-i ngga gŭrot kayuh? Pukong dŭh pakat daya; daya pakat pukong.”

¹⁶TUHAN Bisa-pŭrŭg re pait andam ngga ngukum ngara adi man bisoh madin. Darŭm pŭrŭng ngara re agi apui adi adu adu badang.

¹⁷Tapa, adi jawa Israel, re jadi apui. Tapa kudus Israel re jadi jireb apui, adi darŭm ndi andu badang sopŭrŭg kayuh, samŭn tŭngŭn reja ngga uduh pedang.

¹⁸Tuān ngga tana ŭmŭh ka teya adi damŭn re abo dog badang, nimun andam adi bisā man ka siŭ daya.

¹⁹Tŭngŭn kayuh re raru nisŭ dŭm ndŭg ka tungang dog mirang anak-sŭ.

²⁰Tika-i re mandŭg adi ngga daya Israel adi gibabŭ udip re dŭh tia bisangan di bangsa adi ko dŭm tadŭ re pirabur ngara. Ngara re ngga siabo asŭng ngara sabah di TUHAN, adi Tapa Israel.

²¹Nisŭ adŭ daya Israel re pari ka Tapa ngara adi bikuasa.

²² Sunggu madin daya Israel raru bagŭ mun sumat di bŭngŭn rawŭt, raru nisŭ adŭ adi pari. Pinyirusag mbŭh kajŭn daya Israel, ka-i taŭn patut dog ukum.

²³Sawŭ, di ndi tarun tarun tana rais TUHAN Raja Bisa-pŭrŭg re taban pinyirusag, sak adi muko-I nang.

²⁴TUHAN Raja Bisa-pŭrŭg nang di daya-I adi rŭŭ di Zion, “Dŭhnyah taru daya Assyria, sunggu ngara kinanyuh angān mun daya Egypt kinanyuh angān.

²⁵Dŭm nyitiro Aku re ko ngukum angān, ka komŭnŭ Aku re pirabur ngara.

²⁶Aku, adi TUHAN Bisa-pŭrŭg, re madŭs ngara ngga padŭs Ku mun aku madŭs daya Midia di Batuh Oreb. Aku re ngukum Assyria mun Aku ngukum Egypt.

²⁷Kan tika anŭ mbŭh mandŭg, Aku re pirupas angān so kuasa Assyria, ka ngara re dŭh tia nguasa angān.”[22]

²⁸Bara tibaran soldadu pinganyu mbŭh sirabut kupo Ai![23] Ngara mbŭh mutas Migron! Ngara tingge barang ngara di Michmash!

²⁹Ngara mbŭh mutas ateng anŭ ka nyirŭmŭn di Geba! Daya di kupo Ramah mbŭh taru, ka daya di kupo Raja Saul di Gibeah babak bu.

³⁰Nyirais, daya Gallim! Dingah, daya Laishah! Nam, daya Anathoth!

³¹Daya Madmenah ngga daya Gebim mbŭh bu nyiramat adŭp ngara.

³²Andu ati pinganyu agi darŭm kupo Nob, ka diginŭ ngara kiren pupung ngara natang Sandah Zion, di kupo Jerusalem.

³³TUHAN Bisa-pŭrŭg re piruruh ngara mun daan daan kayuh dog danggo. Ngara adi siabo gambung ngga adi mingangŭn re dog tabŭng ka dog pimangŭh.

³⁴TUHAN re tabŭng ngara mun tŭngŭn tŭngŭn kayuh di yun tuān dog tabŭng ngga kapak. Sunggu ngara bake mun tŭngŭn kayuh Lebanon adi siabo kana, ngara re tumbang gŭh.