Read Biatah Bidayuh ISAIAH 11 Bible Online

ISAIAH 11 - Biatah Bidayuh bible

ISAIAH 11

¹ Taris asar Raja David inŭh mun tŭngŭn kayuh adi mbŭh dog tabŭng; pak keya ka daan bauh adi bikanjak so tŭŭd, simŭnŭ gŭh raja adi bauh re makat so ruang sesang David.

²Roh TUHAN re nggen pinyibijak di ayŭh, pinyipuan ka pimandai ngga mritah daya-I. Ayŭh re puan pinyiraan TUHAN ka stabi di Ayŭh

³ka gagā bituan di Ayŭh. Ayŭh dŭh tingga arap kana kayuh nanyam adi kiris-i bait nanyam ka pinganang daya;

⁴ Ayŭh re tingga arap kana daya sirata ngga pinyitŭnggŭn ka ngibān hak ngara adi dŭh bigaya. Ngga pinyipesan-I daya re dog ukum, ka daya arap re kabŭs.

⁵ Ayŭh re mritah daya-I ngga pinyitŭnggŭn ka pinyibatur.

⁶ Kasong tarun ngga biri re bigaur udip darŭm damai, ka bisuwi re guring ngga anak kambing. Anak sapi ngga anak singah re man[24] samah, ka anak-sŭ re kingat ngara.

⁷Sapi ngga buāng re man samah, ka anak sapi ngga anak buāng re samah guring darŭm damai. Singah re man siriyang mun sapi.

⁸Sirabi ka anak-pira dŭh re kinaman kambŭi-i birubi sindŭk jippŭh adi bisā.

⁹ Di tunduh Zion, sandah kudus Tapa, re mating kayuh adi arap bait adi bisa kandam. Tarun tana re puno ngga pinyipuan TUHAN nimun rawŭt puno ngga piin.

¹⁰ Andu-i re mandŭg kan raja adi bauh so asar David re jadi tandā yŭn bangsa bangsa. Ngara re tikuruk di kupo-i ka nggen stabi di ayŭh.

¹¹Kan andu anŭ mandŭg, TUHAN re pakai dinge kuasa-I ngga taban pari daya-I adi dŭm di Assyria ngga Egypt, di tarun tana Pathros, Ethiopia, Elam, Babylonia, ngga Hamath, ka di tarun tana di bŭngŭn rawŭt ngga di purau purau di rawŭt.

¹²TUHAN re pijog binira-tandā ngga kiren di bangsa bangsa nang adŭp-I nguruk dinge daya Israel ngga daya Judah adi mbŭh papar sasah di barang yŭn di ong ka taban ngara pari.

¹³Pritah Israel re dŭh tia sina di Judah, ka Judah re dŭh tia pinganyu Israel.

¹⁴Ngara re samah samah nyerang daya Philistine di parad ka barat ka mirupak daya adi rŭŭ di parad ka timor. Ngara re nyerang daya Edom ngga daya Moab, ka daya Ammon re bituan di ngara.

¹⁵ TUHAN re nyibadŭh Tanjung Suez, ka Ayŭh re taban sabak adi paras bada nyibadŭh yang Euphrates, kidŭm ju adŭ anak sungi, isa daya dapŭd panu mutas.

¹⁶Re agi aran raya so Assyria yŭn bara daya-I Israel adi gibabŭ udip, mun di jaman tayung-babuk ngara di tika ngara bu so Egypt.