Read Biatah Bidayuh ISAIAH 13 Bible Online

ISAIAH 13 - Biatah Bidayuh bible

ISAIAH 13

¹ Ati inŭh agah pasar Babylon, adi Isaiah anak Amoz trima so Tapa.

²Di tibung sandah adi badu pijog binira perang! Nyirais nang di bara soldadu ka pakat tangan mu ndu tandā bada ngara nyerang tiban-bās kupo adi gambung anŭ.

³TUHAN mbŭh bagan bara soldadu adi mbŭh-I mien. Ngara inŭh pimagan buang adi siabo pandai birawan. Ayŭh bada ngara matak di biperang ka ngukum ngara adi yŭn-I baji.

⁴Dingah sak jawŭn di darŭd, sak jawŭn dudu bara daya; sak jawŭn dudu bangsa ngga pritah pritah tikuruk. TUHAN adi siabo bikuasa aŭn ngatur bara soldadu-I yŭn biperang.

⁵Ngara mandŭg so rais rais adi jo di bŭngŭn ong. Darŭm baji-I TUHAN re pirabur ndi ong ong.

⁶ Nyikaong meh, amai andu TUHAN mbŭh sindŭk, tika TUHAN adi Bisa-pŭrŭg taban pinyirusag.

⁷Tangan barang naan daya re jadi ramah, ka pinyibirani ngara re miyap.

⁸Sopŭrŭg ngara re tikaran ka naman adŭp-i, mun dayung naman sarang andam re biranak. Ngara re kimat dingan-i darŭm taru, ka jawin ngara re bireh sabab mangŭh.

⁹Andu TUHAN re mandŭg, andu adi ngga baji ngga riyŭn-I adi bisā tambus. Ong re jadi tarun tana-pajam, ka barang naan daya bidosa re dog pirabur.

¹⁰ Barang bitang ngga barang uruk bitang re dŭh tia nyekar, batŭh andu re karŭm kan-i makat, ka buran re dŭh biyŭn jawa-i.

¹¹TUHAN nang, “Aku re taban pinyirusag ka ong ka ngukum sopŭrŭg daya ginaka amai dosa ngara. Aku re pirapat barang naan daya adi sambuh ka ngukum barang naan adi gambung ka gaok.

¹²Ngara adi babŭ udip re kurang so mas.

¹³Aku re bada rangit bigagar, ka ong re bigugoh so yŭn-i di andu anŭ kan Aku, adi TUHAN Bisa-pŭrŭg, kiren baji Ku.

¹⁴“Daya tami adi rŭŭ di Babylon re bu ka rais adŭp ngara, mingare mun peyu adi bu mangān bara pingasū, mun biri biri dŭh biyŭn pingingat.

¹⁵Asi asi adi dog nakap re dog tabŭk ndŭg kabŭs.

¹⁶Darŭm ngara tingga buang dŭh bigaya, anak-pira ngara re dog pān di batuh, ramin ngara re dog gruga, ka sawŭn ngara re dog miragag.”

¹⁷TUHAN nang, “Aku kiruyok daya Medes[25] bada nyerang Babylon. Ngara dŭh piduri ani anŭ pirak bait ripong di mas.

¹⁸Ngga bawŭh ka reja-panah ngara siŭ daya adi mara. Ngara dŭh masi di anak-pira bait anak-sŭ.

¹⁹ Babylonia inŭh pritah adi siabo ramus; anŭ inŭh kayuh adi yŭn daya-i mingangŭn. Pak Aku, adi TUHAN, re pirabur Babylon mun Aku pirabur Sodom ngga Gomorrah!

²⁰Mating daya dapŭd rŭŭ diginŭ tia. Mating daya Arab adi bigandon re an pijog bari-i diginŭ, ka mating pingingat-biri re taban kaban biri-i bada man kupai diginŭ.

²¹ Anŭ re jadi tarun yŭn dudu dāng tarun tana-pajam rŭŭ ka yŭn manuk bo bisarin. Manuk onta re rŭŭ diginŭ, ka kambing tarun re agi mirupat di tibawang-i.

²²Re agi angū sirŭŭn masam masam kasong tarun di tawā ngga di istana. Andu Babylon mbŭh sindŭk! Tipuh-i mbŭh re ripuan.”