Read Biatah Bidayuh ISAIAH 14 Bible Online

ISAIAH 14 - Biatah Bidayuh bible

ISAIAH 14

¹TUHAN re masi di daya-I Israel ka mien ngara bada jadi daya adŭp-I dinge. Ayŭh re bada ngara udip di tarun tana adŭp ngara dinge, ka daya tami re mandŭg ka sua rŭŭ diginŭ ayō ngara.

²Bagŭ bangsa re turung daya Israel pari ka tarun tana adi TUHAN mbŭh nggen di ngara, ka diginŭ bangsa bangsa anŭ re jadi urun Israel. Ngara adi muko ngarah Israel re dog ngarah Israel madin, ka daya Israel re mritah daya adi ko kinanyuh ngara.

³TUHAN re nggen di daya Israel pinyirupas so sangsara ngga pinyusah, ka so kraja bakar adi ngara dog takan bada ndai.

⁴Kan Ayŭh ndai simŭnŭ, ngara re napat raja Babylonia sakati: “Raja adi gaok mbŭh rabu! Ayŭh dŭh re tia kinanyuh daya!

⁵TUHAN mbŭh nyirubuh kuasa pimritah adi arap

⁶adi ngga baji kinanyuh daya ka bŭn ko kisiis bangsa bangsa adi ngara ko ngarah.

⁷Madin ndi ong ong mbŭh sanang ka udip darŭm damai, ka barang naan nyanyi ngga gaŭn.

⁸Tŭngŭn tŭngŭn sipres ngga tŭngŭn sedar Lebanon gaŭn angan pinyirabu raja anŭ, sabab mating daya adi re tia tabŭng ngara; madin ayŭh mbŭh mating!

⁹“Ong daya adi mbŭh kabŭs mbŭh sidia an kambat raja Babylonia. Mindo ngara adi ko bikuasa di ong graŭh ka guga. Mindo bara raja makat so takta ngara.

¹⁰Sopŭrŭg ngara nyirais nang di ayŭh, ‘Madin kuu ramah mun kieh! Kuu mbŭh ndi so kieh!

¹¹Kuu ari dog stabi ngga ragu dog mambak ngga kachapi, pak madin kuu mbŭh di ong daya adi mbŭh kabŭs. Isēt jadi tarun yŭn kuu guring ka ŭrŭd jadi putong mu.’

¹² “Raja Babylonia, bitang adi jawa isan isan, kuu mbŭh rabu so rangit! Dawŭ-i kuu ngarah bangsa bangsa, pak madin kuu mbŭh dog taran ka tana.

¹³ Kuu ko bigŭtŭ an maad ka rangit ka tarun yŭn takta mu bigatung so bitang bitang adi siabo bigatung. Kuu pikir kuu re guru mun raja di tunduh darŭd di utara di yŭn tapa tapa tikuruk.

¹⁴Kuu nang adŭp mu an maad ka tunduh abun ka jadi mun Tapa Bisa-pŭrŭg.

¹⁵Pak kuu mbŭh dog bisor ka yŭn adi siabo tŭrŭp di ong daya adi mbŭh kabŭs.

¹⁶“Daya diginŭ adi mbŭh kabŭs re tirek kuu ka inga inga. Ngara re siken, ‘Daya ati kah adi ngugoh ong ka adi bada pritah pritah bigagar?

¹⁷Daya ati kah adi nyirubuh kupo kupo ka bada ong jadi tarun tana-pajam? Daya ati kah adi bŭn pirupas daya takap-i bait bada ngara mari?’

¹⁸Sopŭrŭg raja di ong guring di kubur grua ngara,

¹⁹pak kuu dŭh biyŭn kubur, ka tadang mu dog taran bada madam. Tadang mu dog nambun tadang tadang bara soldadu adi dog siŭ darŭm perang, dog taran ngga ngara di rubang batuh, ka dog digang.

²⁰Sabab kuu pirusak rais mu ka siŭ daya adŭp mu, kuu dŭh re dog kubur mun raja adi bŭkŭn. Mating so rawang mu adi arap anŭ re dŭm.

²¹Tandah bisiŭ anŭ piguru! Bara anak raja re kabŭs sabab dosa tayung-babuk ngara. Mating so ngara re mritah ong bait ndai bagŭ kupo dieh.”

²²TUHAN adi Bisa-pŭrŭg nang, “Aku re nyerang Babylon ka re pirabur-i. Aku dŭh re kidŭm ani ani bait anak-sŭ puan kah asi asi. Aku, adi TUHAN, mbŭh minyu.

²³Aku re bada Babylon jadi tana padak, ka manuk bo re rŭŭ diginŭ. Aku re pisen Babylon ngga pipis adi pisen kadi sopŭrŭg kayuh. Aku, adi TUHAN Bisa-pŭrŭg, mbŭh minyu.”

²⁴ TUHAN Bisa-pŭrŭg mbŭh bipayu: “Kayuh adi Aku bisatur raan ndai re sawŭ jadi. Kayuh adi Aku mbŭh bigŭtŭ raan ndai re sawŭ jadi.

²⁵Aku re pirabur daya Assyria di tarun tana Ku Israel ka bidigang di tunduh ngara di darŭd Ku. Aku re pirupas daya Ku so kuasa daya Assyria ka so jadi urun ngara.

²⁶Ati inŭh kayuh adi Aku mbŭh ngatur yŭn ong, ka mbŭh pakat tangan Ku re ngukum bangsa bangsa.”

²⁷TUHAN Bisa-pŭrŭg mbŭh bigŭtŭ an ndai simŭnŭ; Ayŭh mbŭh pakat tangan-I re ngukum, ka mating daya re tungang bitan Ayŭh.

²⁸ Ati inŭh pinganang adi dog piagah darŭm sawa adi ngga Raja Ahaz kabŭs.

²⁹ Daya Philistia, pukong adi mukong angān mbŭh pata, pak angān dŭh siŭn angan. Kan jippŭh kabŭs, adi arap dŭ re mandŭg di gati. Turoh jippŭh re mupus naga piurad.

³⁰TUHAN re jadi pingingat-biri di daya-I adi sirata ka re bada ngara rŭŭ ngga siramat. Pak Ayŭh re pait apag adi bisā ka angān daya Philistine, ka-i dŭh re tandah tadŭ tadŭ so angān udip.

³¹Nyikaong meh, mite turung, sopŭrŭg ngan kupo kupo daya Philistine! Taru meh, sopŭrŭg ngan! Abun dabu mbŭh mandŭg so utara; anŭ inŭh bara tibaran soldadu, ka ndi naan mating adi pinakut di ruang-i.

³²Munki ata re nam pinyisung pinyisung adi mandŭg tudu ata so Philistia? Ata re kidaan di ngara nang TUHAN mbŭh pijog Zion ka daya-I adi sangsara re rŭŭ diginŭ ngga siramat.