Read Biatah Bidayuh ISAIAH 19 Bible Online

ISAIAH 19 - Biatah Bidayuh bible

ISAIAH 19

¹ Ati inŭh agah pasar Egypt. TUHAN mandŭg ka Egypt, guru di tunduh abun adi raju nyisayar taban ayŭh. Tibudo tibudo Egypt kimŭtŭr di sirung jawin-I, ka pinyipagan daya Egypt miyap.

²TUHAN nang, “Aku re bada perang timbur dupan adŭp daya di Egypt, jurud re rawan jurud ka rasū rawan rasū. Kupo ndi rawan kupo andi, ka raja ndi rawan raja andi, sibiten kuasa.

³Aku re pirusak pusar daya Egypt ka pijimŭ pinyiraan ngara. Ngara re mite turung so tibudo ngara, ka ngara re bisiken ngga daya adi pandai minyu ngga simangi daya adi mbŭh kabŭs, mite pinyitayan so simangi ngara.

⁴Aku re nggen daya Egypt ka darŭm tangan raja adi gaok. Aku, adi TUHAN Bisa-pŭrŭg, mbŭh minyu.”

⁵Yang Nile re surud ka re mupok badŭh.

⁶sungi sungi-i re buuh darŭm-i dŭ dŭ badŭh. Tŭngŭn tŭngŭn reed ngga kupai re rayu,

⁷ka sopŭrŭg pimuruh adi dog purun di tabing Yang Nile re pisŭk ka mikabur dog poh sabak.

⁸Barang naan adi udip so kraja jiroh iken di Yang Nile re nyidaing ka sien; pisis ngga jaring ngara re dŭh tia tipakai.

⁹Ngara adi ndai banang linen re dŭh puan ani re-i ndai;

¹⁰bara pinanun re riruk ka bara tukang adi dog nggen gaji re sien ka muās.

¹¹Bara pinguru di kupo Zoan inŭh daya budo! Daya adi siabo bijak di Egypt nggen pinyitayan adi sipadin! Birani raru ngara kidaan di raja nang adŭp ngara gati daya jah adi pitar-pandai ka bara raja?

¹²Raja Egypt, diki bara tukang pitayan mu anŭ adi pandai? Kadŭ-i ngara bisa kidaan di kuu kayuh adi TUHAN Tapa mbŭh bisatur raan ndai di Egypt.

¹³Bara pinguru Zoan ngga Memphis inŭh daya budo! Ngara sipatut-i nyiruton bangsa anŭ, pak ngara kinanyap-i.

¹⁴TUHAN mbŭh bada ngara nggen pinyitayan adi bada daya riruk. Sabab anŭ meh, Egypt ndai barang masam kayuh adi sarah ka tibabeu di kraja-i keya ka daya mabuk tibabeu tirusap di uta adŭp-i.

¹⁵Mating daya di Egypt, adi kaya puan kah adi sirata, adi bās puan kah daya saja, dapŭd turung.

¹⁶Tipuh-i re mandŭg kan daya Egypt re keya ka dayung adi pinakut. Ngara re kimŭtŭr taru kan ngara kiris TUHAN Bisa-pŭrŭg pakat tangan-I re ngukum ngara.

¹⁷Daya Egypt re taru Judah tiap kari ngara dog bada ingat nasip adi TUHAN Bisa-pŭrŭg mbŭh sidia yŭn ngara.

¹⁸Kan tipuh anŭ mbŭh mandŭg, piminyu Hebrew re dog pakai ngga minyu di rimŭh kupo rais Egypt. Daya diginŭ re bipayu pakai adŭn TUHAN Bisa-pŭrŭg. Ndi so kupo kupo anŭ re dog kadŭn, “Kupo Batuh Andu”.

¹⁹Kan tipuh anŭ mbŭh mandŭg, di Egypt re agi mija-sambah yŭn TUHAN, samŭn ndi uros batuh pinatŭng yŭn-I di baat Egypt.

²⁰Mija-sambah ngga uros batuh kudus anŭ re jadi tandā TUHAN Bisa-pŭrŭg agi di Egypt. Kan daya diginŭ dog kinanyuh ka bagan mite turung so TUHAN, Ayŭh re pait daya bada di nyiramat ngara.

²¹TUHAN re pinandŭng adŭp-I di daya Egypt, ka komŭnŭ ngara re ngaku ka nyambah Ayŭh, ka taban ka yŭn-I sadis ngga pinganggen. Ngara re bipayu ngga Ayŭh ka ndai kayuh adi ngara muko janji.

²²TUHAN re ngukum daya Egypt, pak ripas anŭ Ayŭh re pibua ngara. Ngara re pari ka Ayŭh, ka Ayŭh re dingah dua ngara ka pibua ngara.

²³Kan tipuh anŭ mbŭh mandŭg, di asah Egypt ngga Assyria re agi aran raya. Daya rais rais anŭ re bijaruh matak ka mari kadŭg aran anŭ, ka soduwŭh bangsa anŭ re samah bisambah.

²⁴Kan tipuh anŭ mbŭh mandŭg, Israel re jadi numbor taruh ripas Egypt ngga Assyria, ka taruh bangsa anŭ re jadi berkat yŭn ndi ong ong.

²⁵TUHAN Bisa-pŭrŭg re nyiberkat ngara ka nang, “Aku re nyiberkat kuu, Egypt, adi daya Ku; kuu, Assyria, adi Aku napa; ka kuu, Israel, daya adi Aku mbŭh mien.”